Pak ditë pas arrestimit të tij, Gjykata e Durrësit ka vendosur lirimin e drejtorit të Kavalishencës në Durrës, Ahmet Doda.
Më herët Doda kishte masën e arrestit me burg, e cila iu konvertua në detyrim paraqitjeje.
Në seancën e zhvilluar sot në Durrës ishte i njëjti gjykatës, Paulin Cera, i cili zëvendësoi pranoi kërkesën e tij, duke bërë zëvendësimin e masës së sigurisë.
Ahmet Doda, 52 vjeç, në cilësinë e drejtorit të shtëpisë së pushimit të Ministrisë së Brendshme, u arrestua pas tërmetit katastrofik të 26 nëntorit, ku në këtë shtëpi humbi jetën kryekomisari Bajram Hajdarmetaj, teksa një pjesë e saj u shemb dhe e zuri brenda.
Doda akuzohej si autor i veprës penale “Shpërdorimi i detyrës”, pasi nuk kishte ndërhyrë në kohë për evidentimin e dëmeve që la pas tërmeti i muajit shtator.
Dakord për lirimin e Dodës ka qenë dhe prokurori i çështjes i cili vetëm 10 ditë më parë kërkoi pushimin masë arresti me burg për të.
Gjykata e Apelit u tërhoq në Dhomën e Këshillimit dhe si u kthye, në bazë dhe për zbatim të nenit 112 dhe 234, 242 dhe 260/2 të Kodit të Procedurës Penale,
VENDOSI
1. Pranimin e kërkesës.
2. Zëvendësimin e masës së sigurimit “Arrest në burg” të caktuar ndaj personit nën hetim Ahmet Doda, me vendimin penal Nr. 393/1, datë 17.12.2019 të Gjykatës së Rrethit Gjyqësor Durrës, me masën e sigurimit “Detyrim për tu paraqitur në policinë gjyqësore” parashikuar nga neni 234 i K.Pr.Penale, duke i caktuar edhe masën ndaluese “Pezullimi i ushtrimit të një detyre a shërbimi publik” parashikuar nga neni 242 i K.Pr.Penale.
3. Urdhërohet personi nën hetim Ahmet Doda të paraqitet në Prokurorinë pranë Gjykatës së Shkallës së Parë Durrës, të Hënën e parë të çdo muaji, ora 10:00.
4. Urdhërohet lirimi i menjëhershëm i personit nën hetim Ahmet Doda nga IEVP Durrës, nëse nuk mbahet për ndonjë shkak tjetër ligjor.
5. Kundër këtij vendimi mund të bëhet ankim brenda 5 ditëve në Gjykatën e Apelit Durrës
