Anëtarja e Kryesisë së PD-së, Endira Bushati ka qenë e ftuar sot në emisionin e mëngjesit në ‘’Fax News”, përballë gazetarit Rezear Xhaxhiu, për të komentuar atë që ndodhi dje me Kuvendin Kombëtar të PD-së.
Bushati tha se ky organizim nuk solli asnjë frymë të re, dhe se statuti i ri është bërë vetëm në interes të kryetarit Basha, duke e bërë atë ”të përjetshëm”.
Po ashtu Bushati tha se një pjesë e mirë e pjesëmarrësve në këtë Kuvend, nuk u kontrolluan nëse ishin anëtar të kësaj force politike, dhe të mandatuar për të qenë në kuvend.
Ajo komentoi dhe fishkëllimat në drejtim të Eduard Selamit, teksa i ka quajtur këto veprime të shëmtuara.
“Kishte shumë pak diskutime, gjë që tregon varfërinë e ideve, sidomos pasi në këtë Kuvend vinim pas humbjes së thellë në zgjedhjet e vitit të kaluar. Unë nuk doja të bëhesha pjesë e së shëmtuarës pas fishkëllimave ndaj zotit Selami dhe zgjodha të mos flas në këtë organizim.
Në këtë Kuvend pati vetëm 5 kërkesa për diskutim, gjithçka ishte e paracaktuar., aq sa zoti Gjana pasi kalonin pesë minuta, iu tërhiqte vëmendjen diskutantëve në mënyrë që të mbyllnin fjalën e tyre.
Me këtë statut zoti Basha ia ka dhënë të gjitha pushtetet vetes. Zoti Basha ka thënë se ky status afron anëtarësinë, gjë që nuk është fare e vërtetë. Ne jemi mësuar me zotin Basha, që një gjë thotë të hënën dhe tjetër gjë të martën.
Zoti Basha foli dje për ndjesë, po nuk ka bërë as një mea culpa për qerverisjen e PD-së. Nuk mbyllet gjithçka me një fjali ‘’skemi bërë atë që duhet”. Dhe veç kësaj dhe sa kohë duhet ti japim zotit Basha që të marrë eksperiencën e duhur?”, u shpreh Bushati.
Më tej sa i përket organizimit për zgjedhjet lokale të vitit të ardhshëm, Bushati tha se PD është shumë pas, teksa theksoi se me ndarjen e re territoriale qeveria është më e avantazhuar.
(E.K/FAXWEB.AL)
