Dy të rinj, banues në Pogradec, janë vënë në prangat e policisë nën akuzën e vjedhjes së banesave. Është kryer arrestimi i shtetasve Andrea Olldashi 30 vjeç dhe Noldjan Çollaku 25 vjeç, të cilët akuzohen për vjedhjen e banesave.
Konkretisht, akuzohen për vjedhje të kryera më 8 dhe 27 qershor, ku kanë mundur të grabisin një unazë floriri, varëse floriri, 1 orë dore dhe sasi lekësh.
Detaje të Policisë së Pogradecit:
Policia zbardh dhe dokumenton me fakte ligjore, vjedhjen e dy banesave.
Kapen dhe arrestohen në flagrancë dy autorët e dyshuar dhe shpallet në kërkim bashkëpunëtori i tyre. Sendet e vjedhura, këta shtetas i shisnin në qytetin e Tiranës.
Specialistët e Seksionit për Krimet në Komisariatin e Policisë Pogradec, bënë kapjen dhe arrestimin në flagrancë të shtetasve: Andrea Olldashi, 30 vjeç, Noldjan Çollaku, 25 vjeç, të dy banues në Pogradec.
Si edhe u bë shpallja në kërkim e shtetasit : Zh. S, 22 vjeç, banues në Tiranë. Pasi më datë 27.06.2017, në lagjen nr 3 në Pogradec, këta shtetas kanë vjedhur në banesën e shtetasit R.B, 64 vjeç, një unazë floriri, një varëse floriri, dhe 1 orë dore.
Gjithashtu në vijim të veprimeve hetimore lidhur me këtë rast, u bë i mundur dokumentimi me fakte ligjore i vjedhjes të një banese tjetër, në pronësi të shtetasit A.T, 45 vjeç, ngjarje e ndodhur më datë 08.06.2017,ku shtetasit e lartpërmendur kanë vjedhur një sasi lekësh dhe dy varëse floriri.
Në cilësinë e provës materiale shërbimet e Policisë, gjetën dhe sekuestruan një automjet tip “Mercedes-Benz” me targa TR9268P me të cilin këta shtetas qarkullonin për të kryer vjedhjet, një varëse floriri, një unazë floriri, doreza dhe kaçavida të cilat shërbenin për hapjen e dyerve të banesave.
Nga ana e Policisë, po punohet për identifikimin dhe kapjen e shtetasve të tjerë të dyshuar si të implikuar në këtë veprimtari.
Materialet i kaluan Prokurorisë të Rrethit Gjyqësor Pogradec për veprën penale : “Vjedhja, kryer në bashkëpunim” parashikuar nga neni 134/2 i Kodit Penal.
(XH.A/SHUPLAKA)
