Zjarret në vend/Ministria e Mbrojtjes: 27 vatra zjarri të raportuara në 24 orë

Ministria e Mbrojtjes ka bërë publike të dhënat e fundit lidhur me situatën e zjarreve në vend.

Bëhet me dije se gjatë 24 orëve të fundit janë raportuar 27 vatra zjarri nga të cilat 18 janë shuar.

Vijojnë të jenë aktive ditën e sotme vatrat e zjarrit midis fshatit Kakarriqit, njësia administrative Balldren, fshatit Gjadër, njësia administrative Dajç, bashkia Lezhë, zjarri në fshatin Zavaline, bashkia Elbasan.

Në njësinë administrative Gostimë, bashkia Elbasan po punohet për shuarjen e një tjetër vatre. Ekipet e emergjencave vijojnë punën për shuarjen e vatrave edhe në  zonën pyjore Bode, bashkia Maliq, në fshatin Kus, bashkia Tiranë, në fshatin Mushnik, bashkia Rrogozhinë, në fshatin Vorfë, bashkia Malësi e Madhe, në fshatin Salari, bashkia Tepelenë si dhe në parkun kombëtar Qafshtamë, bashkia Krujë.

Sipas komunikatës në operacionet për shuarjen e zjarreve në 24 orët e fundit janë angazhuar 599 forca operacionale dhe 452 mjete.