Në një takim të ngrohtë me një grup pensionistësh, zëvendësministrja e Ekonomisë, Kulturës dhe Inovacionit, Olta Manjani, ndau me ta jo vetëm mirënjohjen për kontributin e tyre ndër vite, por edhe informacion të detajuar mbi mënyrën se si funksionon skema e pensioneve në Shqipëri.
Duke theksuar se ky nuk është një takim elektoral, por një bisedë e hapur dhe e ndershme, Manjani u përpoq të sqarojë faktorët që ndikojnë në përllogaritjen e pensionit dhe rëndësinë e kontributeve të derdhura gjatë viteve të punës.
Fjala e zv.ministres së Ekonomisë, Kulturës dhe Inovacionit, Olta Manjani:
“Jam shumë e lumtur që ndodhem sot mes jush, këtu me pensionistët, ku më duket sikur jam mes gjyshërve të mi njerëz që kanë kontribuar aq shumë në rritjen dhe edukimin e fëmijëve tanë.
Ndoshta shumëkush mendon se ky është një takim elektoral, por jo, ky është një takim i së vërtetës, sepse është i dhjeti takim që zhvillojmë me grupe të ndryshme për të sqaruar skemën e pensioneve: si llogariten ato dhe pse një pension mund të jetë më i ulët ndërsa një tjetër më i lartë.
Pra, do të mësojmë së bashku cilët janë faktorët kryesorë që ndikojnë në përllogaritjen e pensionit.
Sigurisht që jemi të vetëdijshëm se kjo është një nga temat më sensitive jo vetëm sepse kemi një numër të madh pensionistësh në vend, por edhe sepse skema e pensioneve prek secilin prej nesh. Të gjithë kemi një pensionist në familje.
Burimi kryesor i pensioneve është derdhja e kontributeve të sigurimeve shoqërore. Nëse një pensionist nuk i ka përmbushur vitet e nevojshme për pension të plotë, është e kuptueshme që përfitimi i tij do të jetë më i ulët”– tha Manjani.
