Shqiptarët që trafikojnë drogë drejt Turqisë ndërmarrin aventura të rrezikshme për të transportuar lëndën narkotike siç është edhe ngjitja në trup e sasive të konsiderueshme.
Rasti i arrestimit në Kapshticë të dy personave, Besim Zenuni dhe Elmira Elezi, nuk është i pari rast. Avokati shqiptar Kadri Hoxha, i cili punon në Stamboll ka thënë për “Tv Klan” se shqiptarët që trafikojnë drogë me destinacion Turqinë nuk janë në dijeni të masës së dënimit për këtë vepër penale, ndaj dhe e marrin përsipër këtë risk.
Ai bën me dije se kjo vepër penale dënohet me 18-25 vjet burg edhe për pak kilogramë drogë.
Trafikantët shqiptarë zgjedhin më së shumti transportin rrugor, me mjete private ose autobusë, duke e fshehur lëndën narkotike në pjesë të ndryshme të mjeteve ose brenda produkteve.
Të shpeshta janë rastet e fshehjes së drogës në trup. Përmendim këtu arrestimin e 21-vjeçares Zekollari (e cila ishte shtatzënë) dhe të fejuarit të saj, të cilët u kapën me drogë të fshehur në trup.
Për 2.5 kilogramë drogë që iu gjet ngjitur në trup, ajo është dënuar me 25 vjet burg. Pavarësisht shtatzënisë, ligji turk nuk ka dhënë asnjë lehtësi.
