Ka kaluar sot një vit nga 1-vjetori i vrasjes së të riut Ardit Gjoklaj në landfillin e Sharrës, vdekja e të cilit ka ngritur pikëpyetje të shumta.
Pista kryesore e vdekjes së tij ka qenë ajo e goditjes në kokë nga një eskavator aty pranë, sakaq janë hedhur dhe dyshime ndaj institucioneve të hetimit për shkak se kanë mbyllur sytë në lidhje me çështjen.
Po ashtu pyetja që shtrohet është sesi një i mitur lejohej të punonte dhe ku është roli i Bashkisë së Tiranës në të gjithë ngjarjen.
Protestat e shoqërisë civile kundër kryetarit të Bashkisë së Tiranës Erjon Veliaj kanë qenë të shumta, ku në mënyrë direkte ai është akuzuar si i përfshirë në ngjarje, për shkak dhe të lidhjes së përfolur me kompaninë që merret me riciklimin e mbetjeve në Sharrë.
Po ashtu mjaft është komentuar dhe një takim që Veliaj ka pasur me Prokurorin e çështjes. Dy janë deri më tani personat që janë përballur me drejtësinë për vdekjen e Arditit: Përgjegjësi i turnit i kompanisë “3R” që menaxhonte përpunimin e mbeturinave, shtetasi Dëfrim Hakrama, si edhe fadromisti Edmond Kollari, nuk kanë respektuar rregulloret për mënyrën e punës, si pasojë e të cilave ka mbetur i vdekur shtetasi Gjoklaj, i cili punonte pranë kësaj kompanie.
Për këtë çështje, krahas hetimeve të nisura për vdekjen e 17-vjeçarit, janë duke u zhvilluar hetime edhe për përgjegjësitë e mundshme të kompanisë “3R”, shoqërisë “Eco Tirana” dhe Bashkisë së Tiranës, bazuar në një kallëzim të dorëzuar nga grupi i këshilltarëve bashkiakë të Partisë Demokratike.
Hetimi për kompanitë dhe Bashkinë e Tiranës u veçua nga hetimi kryesor për vdekjen e Ardit Gjoklaj, për faktin se po përfundonin afatet e paraburgimit për dy personat e konsideruar përgjegjës për vdekjen e punëtorit, për të cilët përfundoi hetimi dhe u dërguan për gjykim.
E sa kohë që ka kaluar një vit dhe përgjegjësit mbeten ende pa u ndëshkuar shpresat janë të pakta që drejtësia të vendoset në vend.
(E.K/SHUPLAKA)
