Edhe pse duhet më shumë se një vit nga zgjedhjet lokale, kanë nisur ndërkohë sondazhet. I pari që e ka hedhur një të tillë në treg është Eduard Zaloshnja. Nuk dihet nëse Zaloshnja mund të ketë marrë ndonjë sinjal për zgjedhje të parakohshme.
E nuk kishte si të ndodhte ndryshe, sipas sondazhit të Zaloshnjes PS-ja do të merrte 47% të votave nga zgjedhësit e gatshëm për të votuar.
Nga ana tjetër përveç sondazheve, media të ndryshme kanë nisur të lakojnë edhe emra për kandidatët e mundshëm për bashkitë.
Zaloshnja shkruan:
PS-ja do të merrte votat e rreth 47% të zgjedhësve të gatshëm për të votuar sot, PD-ja rreth 36% dhe LSI-ja rreth 13% (partitë e tjera do të merrnin diferencën).
Kështu më rezultoi nga sondazhi elektronik i këtij muaji, në serinë e sondazheve që kam zhvilluar kohët e fundit për revistën Folloë Business Albania, e cila publikohet nga firma CROSG®. Konkretisht, të anketuarit iu përgjigjën (përmes klikimit), këtyre dy pyetjeve:
Për kë do të votonit, nëse do të zhvilloheshin zgjedhjet sot?
Për kë votuat në qershor 2017?
Sondazhi u krye me 1350 të anketuar në rang kombëtar, për ta përfaqësuar elektoratin shqipëtar sa më mirë, demografikisht dhe politikisht. Maksimumi i marzhit të gabimit statistikor për këtë sondazh është plus/minus 2.7%
Rënia e pjesëmarrjes duket se ka prekur të gjitha partitë, përveç PD-së, e cila ka regjistruar një fare rritje të përkrahjes (në krahasim me përkrahjen tejet të ulët që pati në zgjedhjet e vjetshme).
Nga analiza e përgjigjeve të të anketuarve, rezulton se tkurrja e përkrahjes është më e theksuar tek partitë e vogla (PDIU, LIBRA, FRD, SFIDA, PSD, etj.). Për çdo 100 të anketuar që kishin votuar vjet për këto parti, sot janë gati të votojnë për to vetëm 42. Dhe kjo shpjegohet me faktin se disa nga partitë e vogla pothuaj janë shkrirë fare.
Ndër 630 mijë zgjedhësit që nuk janë gati të votojnë për anjërën nga partitë aktuale, rreth 160 mijë janë sot të lëkundur (mes votimit dhe mosvotimit). Ndër ta, rreth 20 mijë votuan vjet për PD-në, ndërsa rreth 140 mijë të lëkundurit e tjerë votuan vjet për partitë “e majta” (PS, LSI, PDIU, PSD, LIBRA, SFIDA, etj.), ose nuk votuan fare.
(E.K/FAXWEB.AL)
Discussion about this post