Një tjetër rast i lojës së rrezikshme “Balena Blu” është konstatuar në vendin tonë. Këtë herë është fjala për një 12-vjeçare në qytetin e Gjirokastrës. Rasti është pikasur nga shokët e klasës së vajzës, të cilët i kanë parë asaj në trup shenja të vetëplagosjes.
Po ashtu e mitura ka 10 ditë që nuk ka konsumuar ushqim dhe është në nivelin e 33-të të kësaj loje të rrezikshme.
Lajmi është konfrimuar dhe nga Drejtoria e Arsimit në Gjirokastër. Kjo drejtori iu bën apel prindërve që të jenë më të kujdesshëm me fëmijët e tyre.
Kujtojmë se kjo është një nga lojërat më të rrezikshme në botë, e përhapur fillimisht në Rusi dhe më pas edhe në vendet e Perëndimit.
Më parë në vendin tonë është konstatuar dhe rasti i një nëntë vjeçari që po ashtu është bërë pjesë e kësaj loje të rëndë që luan me psikologjinë e fëmijëve.
SI FUNKSIONON LOJA:
Kjo “lojë” e rrezikshme nis fillimisht me tortura të njëpasnjëshme, si të presësh veten me thikë, të zgjohesh në orën 4:20 të mëngjesit për të parë videot e frikshme që të dërgon kuratori dhe sfida të tjera që fëmijët duhet t’i kryejnë për 50 ditë.
Ndërsa faza finale është ajo e kërkesës që fëmija të hidhet nga tarraca e një pallati. (E.K/Shuplaka)
