10 familje u përmbytën në Gramsh, bashkia: Nuk kemi mundësi që t’i sistemojmë, të strehohen te të afërmit

Reshjet e dy ditëve më parë sollën probleme të shumta dhe përmbytje në bashkinë e Gramshit. Situatë më problematike përjetuan 10 familjet në lagjen Oltë, ku pjesa dërrmuese e tyre i takojnë komunitetit egjyptian. Shiu i furishëm bërë që të dalë nga shtrati përroi  që gjendet sipër lagjes, ndërsa afërsia me lumin Devoll nga ana tjetër e bënte situatën edhe më dramatike. Edhe pas dy ditëve gjendja paraqitet kritike. Familjarët kanë nxjerrë jashtë cdo orendi, ndërsa janë në përpjekje për të pastruar baltën që u ka hyrë në shtëpi. Banorët tregojnë orët e tmerrit, sesi arritën të shpëtojnë të paktën fëmijët, ndërsa prej dy netësh e kanë kaluar natën jashtë, ku shprehen  se askush nuk i është ofruar për ndihmë.

“Mezi arritem të shpetojmë femijët. Madje në tentativen e shpetimit ata pinë edhe ujë. I kemi me temperaturë. Prej dy netesh flemë jashtë. Askush nuk na është ofruar për ndihmë, nuk kemi as ushqime.”

Të indinjuar me pushtetin lokal, familjarët kërkuan më tepër vëmendje për pakicat kombëtare që jetojnë në Shqipëri . Pa asnjë mundësi tjetër strehimi, pasi gjithcka kishin e humbën i drejtohet për ndihmë shtetit.

“Na kanë lënë në harresë se jemi egjyptianë. Bashkia thote ikni strehohuni diku tjeter. Po ku ti gjejme lekët ne. Të na gjejne punë dhe punojmë ne, madje ikim edhe nga këtu. Shteti të na ndihmoje, se nuk kemi rrugë tjetër.”

Kryetarja e bashkisë së Gramshit Luljeta Dollani pranon situatën e vështirë në lagjen “Oltë”. Teksa e konsideron të pajetueshme këtë lagje, Z. Dollani thekson se pushteti local e ka të pamundur ti strehojë dikujt tjetër 10 familjet, ndaj kërkon prej këtyre të fundit të sistemohen tek të afërmit e tyre, pasi bashkia Gramsh ende nuk e ka një banesë sociale.

“Ajo lagje është vërtet e pajetueshme. Ne u kemi bërë thirrje edhe më herët banorëve të sistemohen në vend tjetër. Bashkia vetë e ka të pamundur t’u sigurojë një strehë. Ne ende nuk kemi banesa sociale për të sistemuar njerëzit në nevojë.”

Për përmbytjen e banesave banorët bëjnë  përgjegjës mos pastrimin e përroit . Ata i druhen faktit se nëse reshjet e radhës do ti gjejnë të papërgatitur , bilanci do të jetë edhe më i rëndë.