Banorët që ishin strehuar në “Egi Center” në zonën e Unazës së Madhe, pas tërmetit të 26 Nëntorit, nga dita e sotme do të jenë në rrugë të madhe.
Kjo për shkak se godina disa katëshe do të shembet sot pasdite me shpërthim të kontrolluar, me rreth 10 kilogramë lëndë plasëse.
“IKMT do te shembe sot ne oren 15.30 me shperthim te kontrolluar nje objekt 6 katesh ne zonen e “Astir” ne gjurmen ku do te kaloje Unaza e re. Ne trupin e objektit jane hapur 250 furnela (vrima) ku do te vendosen 10 kg lende plasese…”, njofton IKMT.
Ndërkohë që Fax News ka qenë sot pranë banorëve, të cilët shprehen se nuk e dinë se ku do të strehohen nga sot, pasi nuk kanë mundësi që të gjejnë asnjë banesë me qera, çmimet e të cilave janë rritur edhe më shumë në këto ditë të ftohta dimri. Ato i bëjnë thirrje qeverisë që ti ndihmojë pasi bonusi prej 12 mijë lekësh në muaj, nuk mund ti japë asnjë zgjidhje.
“I bëj thirrje kryeministrit të na japë zgjidhje, jemi invalidë, të lutem shumë një strehë sa për të futur kokën bashkë me fëmijët. Nuk kërkojmë luks, a më kupton”, tregon një prej banorëve.
Ndërkohë që një tjetër qytetare shprehet se i kanë premtuar banesa sociale, po derimë tani nuk kanë përfituar asgjë të tillë. Ajo tregon se nuk është interesuar askush nga Bashkia.
“Unë kam qenë me qera në Durrës, dhe nuk kam pasur asnjë ndihmë”, tregon një tjetër qytetare.
Në total në Egi Center ishin strehuar 12 familje, që nga sot do tiu shtohen personave që nuk kanë një çati mbi kokë.
(E.K/Faxweb.al)
