Ish-ministri i Drejtësisë, Spartak Ngjela, kërkon që të hetohet rasti i përfolur këto ditë në media, ai i skocezit të dënuar me burgim pas akuzave për pedofili.
Rasti i skocezit David Brown që është në burg prej 11 vitesh, që prej vitit 2006, është në prag të kolapsit.
Spartak Ngjela beson se rasti i tij, i dënuar me 20 vjet burg, duhet të hetohet për korrupsion. Ai kërkon nisjen e hetimeve për trajtimin e rastit. “Ky është një skandal i drejtësisë shqiptare dhe mendoj se kemi të bëjmë me korrupsion. Procedura penale duhet të nisë me psikologun, e pas tij nuk mund të themi se ky rast përfundon. Kemi një zinxhir njerëzish të përfshirë në këtë shkelje.”, është shprehur Spartak Ngjela.
David Brown nga Edinburgh punoi me fëmijët për 35 vjet në Skoci, përpara se të vendoste të vinte në Shqipëri, në vitin 2000, për të ndihmuar refugjatët e rinj të ardhur në Shqipëri pas Luftës së Kosovës.
Ai ngriti një jetimore në vitin 2000, por u arrestua në vitin 2006, nën akuzën e abuzimit. Dy burra të tjerë që punonin me të, u shpallën fajtorë, njëri prej tyre pedofil. Në dëshminë e tij, Brown pohoi përgjegjësinë se ishte treguar naiv kur u kishte besuar dy të akuzuarve të tjerë, por mohoi akuzat ndaj tij duke u shprehur i bindur se nuk kishte prekur asnjë fëmijë.
Krahasuar me dy të akuzuarit e tjerë që vuajnë dënimin në burgjet anglese, David Brown mbahet në siguri të lartë në burgun 302 në Tiranë, i vetmi i huaj mes 300 shqiptarëve.
Dy djemtë që e akuzuan atë, Andon Qoshlli dhe Denis Aliu, kërkojnë falje dhe shprehen se janë të gatshëm të pastrojnë emrin e tij në gjykatë. Ata fajësojnë psikologun dhe oficerin e policisë, si personat që i nxitën të dëshmojnë kundër Brown.
(XH.A/SHUPLAKA)
Discussion about this post