Arbeni nga fshati Vrakë i Shkodrës është 11 vjeç, por nuk ka shkuar asnjëherë në shkollë. Kjo sepse ai ka frikë të dalë nga shtëpia pasi “është në gjak”.
Historia e të voglit Arben u bë publike në emisionin “Fiks Fare” të televizionit Top Channel.
“Unë e kuptoj këtë situatë. Kam frikë nga gjakësi, se njeriu frikë për jetën ka”, janë fjalët e 11-vjeçarit.
Për shkak të gjakmarrjes 25-vjeçare, familja Gjonluli është sulmuar disa herë me armë zjarri.
Gjyshi i Arbenit, Marku tregon historinë se si nisi kjo gjakmarrje.
“Djali im vrau një kushëri. Edhe pse ai vuan dënimin, familja jonë qëndron e ngujuar. Disa pjesëtarë kanë ikur jashtë shtetit. Frika më e madhe është për nipin 11-vjeçar. Edhe kur shkojmë për të mbushur ujë, qëndroj tek cepi i ferrës për të parë nëse kalon gjakësi”, thotë Marku, ndërsa shton se më mirë të vrasin atë.
“Unë jam i vjetër dhe nuk i duhem as dreqit”, vijon Marku.
Shefi i krimeve në Policinë e Qarkut Shkodër, Genti Berberi, thotë se nga statistikat e fundit janë 47 familje të ngujuara dhe 12 fëmijë që nuk shkojnë në shkollë për shkak të këtyre problemeve.
Ndërsa në Drejtorinë Arsimore Shkodër, inspektori Entri Çaku pohon se ky institucion ka identifikuar 5 fëmijë të ngujuar dhe u ofron atyre mësim.
