Pas 124 ditë proteste të vazhdueshme Aleanca për Mbrojtjen e Teatrit do të zhvendosë sot protestën e saj tek Kuvendi i Shqipërisë ku pritet të miratohet ligji i amenduar për Teatrin Kombëtar pas miratimit të dekretit të presidentit Meta vetëm me votat e maxhorancës në Komisionin e Veprimtarisë Prodhuese.
Protesta për mbrojten e teatrit do të zhvillohet paraditen e sotme duke nisur prej orës 09:45 minuta para Parlamentit ku janë ftuar të gjithë qytetarët që të marrin pjesë.
Ndërkohë Aleanca për Mbrojtjen e Teatrit i ka bërë thirrje opozitës sot të jetë në Kuvend të mbrojë Teatrin Kombëtar.
“Sot opozita duhet të mbrojë Teatrin në Parlament. Të mos lejohet miratimi i ligjit antikushtetues”, shprehet aleanca.
Nga ana tjetër i ftuar në emisionin ”Zgjohu” në Fax News regjisori Edmond Budina është shprehur se vendi po shkon drejt akteve diktatoriale, sa kohë që nuk marrin parasysh vendimin që ka marrë presidenti.
‘’Një lëvizje e tillë të çon drejt diktaturës, unë nuk e dua dhunën dhe përplasjen fizike, por kur dikush nuk i përgjigjet dashurisë tënde, duket se është e vetmja zgjidhje që na mbetet. Ky akt që po kryhet nga ana e qeverisë më jep një ndjesi mafioze dhe është në shkelje të hapur me Kushtetutën e vendit” , u shpreh Budina.
Ndërkohë që regjisori Budina ka komentuar dhe përçarjen në radhët e artistëve, dhe një foto të Reshat Arbanës me Erion Veliajn, ku është shprehur se një aktor si Arbana nuk ka nevojë për lëmoshë, përmes një pensioni special.
‘’Pse duhet të ishte një moment si ky që Reshati të merrte një pension special, ai e ka merituar këtë që prej shumë kohësh për punën e tij, dhe në këtë moment klasa politike ka bërë që një artist i tillë të dalë me kokën ulur”, u shpreh më tej regjisori.
Kujtojmë se beteja për Teatrin ka nisur prej disa muajsh, ndërsa një pjesë e aktorëve e kanë shoqëruar me protesta të përditshme vendimin e qeverisë për të prishur godinën dhe për të favorizuar një kompani private siç ishte Fusha, ajo që bëri dhe ofertën e pakërkuar ndaj qeverisë shqiptare në ndërtimin e një godine të re.
Pas reagimit të disa isntitucioneve ndërkombëtare, por edhe dekretit të kthyer të presidentit Meta, qeveria ka hapur garën dhe për hyrjen në konkurim të kompanive të tjera për ndërtimin e Teatrit, po jo rikonstruksionin e tij.
(E.K/FAXWEB.AL)
Discussion about this post