Kryebashkiakja e Berlinit, Franziska Giffey foli për 15 minuta në telefon me një burrë që iu prezantua si kryebashkiaku i Kievit, Vitali Klitschko. Por më pas lindi dyshimi se homologu i saj ishte në fakt një mashtrues.
Siç shkruan “Deutsche Welle”, video-telefonata mes kryebashkiakes së Berlinit dhe burrit që pretendonte të ishte kryebashkiaku i Kievit, Vitali Klitschko, u ndërpre.
Kështu tha të premten kancelaria e Senatit të Berlinit.
“Nuk kishte asnjë pikë referimi që videokonferenca nuk po zhvillohej me një person real. Me sa duket, ishte një mashtrim i thellë. Policia është thirrur për të hetuar.”– shkroi kancelaria në Twitter.
Sipas zëdhënëses Lisa Frerichs, 15 minutat e para të bisedës mes kryebashkiakes dhe mashtruesit ishin krejtësisht të pavërejshme.
“I supozuar z.Klitschko pyeti se si po ia dalim me refugjatët e shumtë ukrainas, si po përballemi me ta, cilat janë numrat – një bisedë krejtësisht normale, siç e kishim pritur.”- tha ajo për video-telefonën, e cila ishte bërë disa ditë më parë.
Pyetjet e çuditshme nga Klitschko i rremë
Dyshimet e kryebashkiakes Giffey u ngritën kur personi donte të fliste për ukrainasit që “përpiqeshin të merrnin përfitime sociale në Berlin”.
“Dhe kishte një kërkesë që ne mund të ndërmarrim veprime përmes autoriteteve për të mbështetur të rinjtë që kthehen në Ukrainë për të luftuar.”- shtoi zëdhënësja e kryebashkiakes.
Frerichs tha se tema e fundit, mbi të drejtat e homoseksualëve, ishte edhe më e pazakontë: “Ai pyeti nëse ne mund të mbështesim Kievin në një kapacitet këshillues për të pritur një lloj CSD (Dita e Rrugës së Kristoforit). Kjo ishte mjaft e çuditshme në dritën e luftës.”
Lidhja më pas u ndërpre. Stafi administrativ i kryebashkiakes më vonë tha në një postim në Twitter se ambasadori i Ukrainës në Gjermani, Andriy Melnyk, konfirmoi se Giffey nuk kishte folur vërtetë me Klitschko-n.
