15 është numri i të ndaluarve dhe shoqëruarve në polici lidhur me atentatin e shënuar ditën e djeshme në autostradën Tiranë-Durrës, ku mbetën të vdekur Ervin Dalipaj dhe Juxhin Dautaj. Ndër të shoqëruarit, mësohet se ka edhe persona me precedent penalë të mëparshëm.
Në kuadër të hetimit të nisur nga grupi hetimor, policia ka sekuestruar kamerat përgjatë rrugës që mund të ndihmojnë në zbardhjen e krimit të rëndë.
Bëhet e ditur se po hetohet në dy pista, në atë të hakmarrjes dhe tek e kaluara kriminale. Nga ekspertiza rezulton se mbi ta u qëllua 28 herë në një distancë prej 3 metrash. Sipas ekspertëve, autorët ishin vrasës profesionistë me pagesë.
Nga të dhënat e deritanishme flitet se dy viktimat kishin ndaluar në një pikë servisi gjatë itinerarit të tyre për shkak se mjetit nuk po i punonte një sinjal. Ata nuk banonin në Durrës, por në Tiranë.
Ngjarja e rëndë u shënua rreth orës 13:55 tek “Mbikalimi i Sukthit”, teksa dy viktimat ishin brenda mjetit “Audi” në ecje. Mbi automjetin e drejtuar nga Dalipaj u zbrazën dhjetëra plumba, 20 prej të cilave goditën në trup Ervin Dalipaj.
Ai ishte ish-polic, ish-shefi i krimit ekonomik në Tiranë, i akuzuar për rrëmbimin, torturimin dhe vrasjen e Gazmend Çollakut. Viktima e dytë, Juxhin Dautaj, ishte i akuzuar për vrasjen mikut të tij, Fatjon Banit në qytetin e Vlorës në vititn 2012.
(XH.A/SHUPLAKA)
Discussion about this post