Familja e Zef Markut nga Nënshati i njësisë administrative të Hajmelit në Bashkinë Vau Dejës, jeton pa energji elektrike. Kryefamiljari Zef Marku jeton me bashkëshorten e tij Pashken që prej më shumë se 15 vitesh në një banesë kasolle dhe pa asnjë rrymë energjie, si pasojë e mos lidhjes me rrjetin.
Kryefamiliar Zef Marku ka katër vite që vuan nga disa sëmundje kronike të rënda, më kryesorja vuan nga mushkritë dhe për rrjedhojë ka nevojë për oksigjen vazhdimisht, ndaj që të ketë oksigjen i duhet pa tjetër energjia elekrike që të mundësojë funksionimin e aparatit të oksigjenit.
Menjëherë pas interesimit të Fax News për këtë famijle në nevojë, është bërë e mundur nga OSHEE gjetja e kabullit, vendosja e shtyllave dhe shtrirja e linjës deri tek banesa e Zef Markut.
Tani pritet lidhja e kontratës për tu lidhur me rrjetin elektrik, por nga kjo familje në nevojë, me dy invalid dhe me të ardhura që nuk plotësojnë nevojat as për ilaçe pa përmendur mjetet bazike të jetesës, nuk ka mundësi që ta paguajë lidhjen e kontratës.
Apeli i kësaj familje ndaj qeverisë, pushtetit vendorë dhe shoqatave humanitare është që të ndihmohet për lidhjen e energjisë elektrike, që t’i mundësohet 75-vjeçarit vendosja e aparatit të oksigjenit, për ti jetuar siç duhet ditët e mbetura nga jeta e tyre e stërvuajtur.
