Eksperti i çështjeve të punësimit, Erion Muça, ishte i ftuar në një lidhje “Skype” ditën e sotme në “Fax News” për të folur mbi largimin e shqiptarëve.
Gjatë intervistës me gazetarin Albi Rakip, Muça tha se ka disa faktorë që e nxisin emigracionin, ku përfshihet mungesa e meritokracisë, rritja e inflacionit në përpjestim me pagësat, mungesa e modernizimit të sipërmarrjeve, mospatja e një promovimi të brendshëm dhe mungesa e motivimit nëpërmjet bonuseve.
“Po t’i referohemi raporteve ndërkombëtare, studimeve dhe anketimeve të bëra, mund të them që ka 160 mijë shqiptarë të larguar, një shifër e saktë që është trajtuar në fasha vitesh, e jo një-vjeçari.
Njerëzit largohen për disa arsye dhe interesi kryesor është për çështje pune apo bashkimi familjar, ndërkohë që lidhet edhe me shumë faktorë të tjerë, si niveli i meritokracisë apo kërkimi i karrierës dhe suksesit nëpërmjet punës.
Rritja e inflacionit, rritja e çmimeve nuk ka ecur në sinkron me pagën dhe rritjet progresive të tyre; lidhet gjithashtu edhe me një koncept të rëndësishëm mbi mungesën e standardeve dhe modernizimin në shumë industri e sektore.
Një problem është modernizimi i sipërmarrjeve dhe bizneseve që ende sot nuk po bëjnë aq sa duhet për të qenë sensitiv me punonjësin dhe motivimin e tyre, duke e cilësuar atë si aset, dhe difekti duket që në respektin e kontratave të punës.
Njerëzit largohen dhe nga mungesa e sistemit të promovimit të brendshëm. Sot, një punonjës e di pagën e tij, por duhet të dijë edhe progresionin se ku do të arrijë brenda një kompanie, duke bërë kështu që mos ta projektojë dot të ardhmen brenda kompanisë, si shkak i mungesës së promovimit të brendshëm.
Lidhet gjithashtu me vizionin dhe edukimin e sipërmarrjeve për të zhvilluar kulturë organizative brenda tyre dhe të jenë sa më të kujdesshëm me bonuset dhe përfitimet që punonjësi të ndihet i trajtuar mirë financiarisht, për të qenë të predispozuar për të qëndruar në kompani, e për mos t’u larguar nga vendi,”- tha ai për “Fax News.”
Discussion about this post