Një vogëlush qëndron i braktisur prej katër muajsh në maternitetin e Durrësit, aty ku shtrati nr. 99 i reanimacionit të maternitetit vijon të jetë i zënë. Bëhet fjalë për një foshnje të braktisur nga nëna e tij 17-vjeçare, e cila vuan nga probleme mendore.
Shefja e repartit të maternitetit, Dhurata Beshello, ka shpjeguar për “DurrësLajm” se foshnja u soll nga e ëma, motra e së cilës hapi kartelë mjekësore dhe pas lindjes e la foshnjen aty me pretendimin se e ëma nuk kujdeset dot, duke mos u interesuar asnjëherë.
Doktoresha shpjegon se vogëlushi me emrin Klejdi është bërë shumë i dashur për mjekët e pavionit. Ajo shprehet se së shpejti ai pritet të transferohet në Shtëpinë e Fëmijës.
“Klejdi është bërë shumë i dashur për ne. E ushqejmë dhe kujdesemi të gjithë për të që të mos i mungojë asgjë. Kemi bërë gati dokumentacionin për ta dërguar në Shtëpinë e Fëmijës”, ka rrëfyer ajo.
Dhurata Beshello shpjegon se ky nuk është rasti i parë, pasi para disa muajsh një tjetër fëmijë u dërgua në Shtëpinë e Fëmijës, i cili pasoi dy foshnja të tjera të dërguara më herët.
Ajo ngre shqetësimin për zgjatjen e procedurave të transferimit, për shkak se gjatë qëndrimit të foshnjes në maternitet, të gjithë afeksionohen me të.
“Mendoj që zgjatet shumë kjo procedura e nisjes së fëmijëve nga materniteti deri në Shtëpinë e Fëmijës. Afeksionohemi të gjithë me këta fëmijë, të cilët i rrisim vetë. I gjithë stafi sa vjen në punë, kujdeset për ta.”, është shprehur më tej mjekja. (XH.A/SHUPLAKA)
Discussion about this post