Studentët të cilët për 13 ditë rresht kanë bojkotuar mësimin në universitet, do të protestojnë sërish sot para kryeministrisë për të kërkuar plotësimin e kërkesave të tyre.
Ndërkaq dhe studentët nëpër qytete të tjera të Shqipërisë, kanë mbështetur protestën e studentëve në Tiranë duke protestuar në qytetet e tyre, por edhe duke u bashkuar me bashkëmoshtarët e tyre në kryeqytet.
Për protestën e ditës së sotme, nga qyteti i Korçës janë nisur drejt Tiranës rreth 200 studentë. Që prej orëve të para të mëngjesit drejt Tiranës janë nisur 4 autobuzë të cilët do ti bashkohen studentëve në Tiranë.
Grumbullimi i të rinjve do të fillojë në orën 8:30 në fakultete prej nga do të nisë marshimi drejt bulevardit “Dëshmorët e Kombit”.
Qeveria nuk ka reaguar deri tani për të plotësuar kërkesat e studentëve, por ka vazhduar të kërkojë dialog për plotësimin e tyre.
Kërkesat e studentëve:
1-Rritja e buxhetit me 5 % e GDP me qëllim mundësimin e përgjysmimit të tarifës së studimit për çdo nivel studimi, përmirësimin e mësimdhënies dhe infrastrukturës, Universitet/konvikt.
2-Transparencë me buxhetin nga Ministria e Arsimit, Sportit dhe Rinisë dhe IAL-ve, publikimi i të gjitha shpenzimeve online.
3-Rritja nga 10 % në 50 % e peshës totale të votës së studentëve për të zgjedhur kandidatët për dekan, rektor dhe çdo fakultet të ketë një përfaqësues të studentëve në senatin akademik.
4-Rishikim i titujve akademikë dhe verifikimi i plagjiaturave të doktoraturave dhe teksteve mësimore.
5-Mbështetur në nenin 99 mbi Këshillet e Studentëve, Ligji i Arsimit të lartë, pika 2 kërkojmë që Bordi i Administrimit të IAL-ve të ketë numër të barabartë votash si nga MASR dhe IAL-të si dhe të shtohen një përfaqësues në këtë bord nga studentët.
6- Pajisja e të gjithë studentëve me Kartën e Studentit brenda vitit akademik 2018-2019 (të ndiqen nga bashkitë përkatëse)
7-Ndërtimi i një biblioteke me standarde Europiane dhe me libër universitar online, falas për studentët në gjuhën shqipe.
8-Vlerësim i perfomancës në mësimdhënie dhe kërkim shkencor i pedagogut, publikim i tij, online dhe regjistrimi i leksioneve.
(M.Q/Faxweb.al)
