Drejtoritë tatimore në Rajonale kanë ulur intensitetin e denoncimeve për veprat penale në lidhje me taksat dhe tatimet, gjatë vitit 2016, por siç shihet nga shpërndarja gjeografike e tyre Shkodra rezulton të jetë qarku më i penalizuar.
Sipas të dhënave zyrtare të Prokurorisë së përgjithshme 21 për qind e procedimeve penale për fshehjen e të ardhurave i përkasin qarkut të Shkodrës edhe pse ky qark nuk renditet ndër të parët për rolin që ka në Prodhimin e Brendshëm Bruto. Më tej 15 për qind e denoncimeve i përkasin Tiranës, 13 për qind Beratit dhe Fieri dhe Durrësi me nga 6 për qind të rasteve dhe pjesa tjetër shpërndahet në qarqet e tjera.
Në vitin 2016 u proceduan penalisht 214 persona për fshehje të ardhurave me një ulje të procedimeve 58% krahasuar me 2015, kur qeveria dhe entet e saj morën një aksion të egër antiinfomalitet.
Por të dhënat e prokurorisë tregojnë se evazorët kanë qenë kryesisht ambulante dhe biznese të vogla. Pasi siç shihet nga të dhënat 22 për qind e të pandehurve ishin më arsim të 9-vjecar, 63 për qind e tyre me arsim të mesëm dhe vetë 15 për qind më arsim të lartë.
Nga të pandehurit 91.4 për qind kanë qenë meshkuj dhe 8.6 për qind kanë qenë femra. Ndërsa mbi 80 për qind e tyre kanë ushtruar aktivitet në qytet dhe pjesa tjetër në fshat.
Prokuroria e përgjithshme vë në dukej një rënie të ndjeshme të denoncimeve për rastet e korrupsionit në administratë dhe shmangies së taksave më 2016 krahasuar me një vit më parë.
Zyra e prokurorit të përgjithshëm thotë se në vitin 2016 ka një ulje prej 24.4 për qind të numrit të procedimeve të regjistruara për veprat penale të korrupsionit. Por vetëm 35 për qind e rasteve janë dënuar nga gjykata. Dënime për ato që kanë dhënë paratë dhe ndërmjetësit ishin sa dyfishi iatyre që më të vërtetë kanë përfituar pagesat e korrupsionit./ Revista Monitor
