Sekretar i Përgjithshëm i Partisë Demokratike, Gazment Bardhi, ka deklaruar se kjo forcë politike ka paguar vetëm 25 mijë dollarë për lobim.
Bardhi ka thënë gjithashtu se gjithë të tjerat janë mashtrim, duke akuzuar prokurorinë se deklarat e saj janë politike.
“Prokurori po heton mënyrën se si PD ka deklaruar shpenzimet e veta pranë KQZ. Ajo që thotë organi i prokurorisë është një mashtrim, ka dalë në konkluzione pa përfunduar hetimet. Të dalësh me konkluzione përfundimtare do të thotë që ti po përdoresh. PD ka paguar aq sa ka deklaruar në KQZ, 25 mijë dollarë. Prokuroria ka gjithë dokumentacionin që ka ardhur nga jashtë”, deklaroi Bardhi në “Opinion”.
Gazment Bardhi ishte një nga eksponentët e PD-së që u thirr nga organi i akuzës për të dhënë shpjegime për këto kontrata, pavarësisht se ai është zgjedhur në vitin 2019 në postin e Sekretarit të Përgjithshëm të PD-së, ndërsa tha se prokurori nuk i kishte bërë asnjë pyetje.
“Prokurori më kishte thirrur për të pyetur. Më tha nuk kam asnjë pyetje për ty. Isha ftuar si person që kisha dijeni, unë jam zgjedhur sekretar në 2019 ndërkohë që kjo ngjarje ka ndodh në 2017”, theksoi Bardhi”.
(F.GJ/FAXWEB.AL)
