Sot është 27 vjetori i krijimit të shoqatës “Çamëria”. Shpëtim Idrizi, kreu i kësaj shoqate në një deklaratë për mediat, ka shprehur të gjitha problematika që shqetësojnë “çështjen çame”.
Idrizi shprehet se do të protestojnë me çdo mjet, kundër varrezave të ushtarëve grekë në Shqipëri.
“Kurrë nuk do të heqim dorë prej saj. Ajo që s’të vret të bën më të fortë. Do të kërkojmë me këmbëngulje ngritjen e përmendores për të rënët në çamë. Shqiptarët e Çamërisë i ka ndjekur fati i keq, i kanë vrarë dhe i kanë dëbuar. Problemet s’i kemi krijuar ne me fqinjët, ata janë problem. Nuk jemi ne problem por është Athina,”- u shpreh kreu i PDIU-së.
Shpëtim Idrizi sulmoi edhe ministrin Bushati kur tha se diplomacia shqiptare ka qenë kokëulur përballë asaj greke. Idrizi tha se varrezat e ushtarëve grekë nuk duhet të pranosheshin nëse Greqia nuk pranonte varreza pë çamët e vrarë.
Ai deklaroi se nuk ka arsye pse të gëzohemi për heqjen e ligjit të luftës nëse realizohet, pasi me ligjin duhet të bien edhe aktet ligjore që ndalojnë marrjen e pronave nga ana e çamëve. Shpëtim Idrizi u shpreh skeptik për zgjidhjen e problemeve me Greqinë, ndërsa i bëri thirrje palës shqiptare që të tregohet e dinjitetshme në marrëdhëniet me Greqinë.
Ndër të tjera Idrizi ka lëshuar akuza të forta ndaj qeverisë lidhur me negociatat që po zhvillohen me Greqinë.
“Dikur greku përdorte bandat, sot politikanët tanë me dy fytyra për marrëveshje. Problemet me fqinjët nuk i krijuam ne, por ata janë gjithmonë problemi. Nuk dihet a është marrëveshja zgjidhja e problemit. Nuk e di, këto koka të mëdha si do të përballen me kujtesën e kombit”, tha Idrizi.
(F.M/Faxweb)
Discussion about this post