Një ndër projektet e qeverisë që prej ardhjes në pushtet, një projekt i nisur nga qeveria e kaluar, vazhdon ende të mos aplikohet, pavarësisht se premtimi ka kohë që është bërë dhe zgjedhjet për qeverinë e re po afrohen.
Një investigim i kryer nga “Pse”, nga gazetarët Nertila Dosti dhe Enkel Xhangoli, nxjerr në pah se investimi prej 3.5 milionë euro është një projekt për klasat “inteligjente”, por pa internet.
Gjatë investigimit janë pyetur nxënës nga shkolla të ndryshme të Tiranës, por edhe nga rrethet, të cilët kanë konfirmuar se tabletët qëndrojnë në kuti, për shkak të mungesës së kushteve, mungesës së internetit apo edhe mësuesve që nuk ia kanë shumë idenë.
“Për të garantuar efikasitetin e projektit Ministria e Arsimit gjithashtu deklaroi në prill të vitit 2015 se ka trajnuar rreth 4000 mësues.
Por, për mësuesit ky trajnim nuk duket se ka shkuar në mënyrën më të mirë të mundshme, duke qenë se disa nxënës i thanë PSE se shpesh i ndihmojnë mësuesit në përdorimin e pajisjeve teknologjike.
“Ka zysha, që edhe pse janë trajnuar, kërkojnë ndihmën tonë për të përdorur tabelën elektronike dhe tabletet. Ato nuk i kushtojnë shumë rëndësi përdorimit të tableteve dhe i neglizhojnë”, – thotë një nxënëse që nuk do të identifikohet.”, shkruhet në artikull.
Projekti ambicioz i Ministrisë së Arsimit nisur në vitin 2013 parashikonte që tabletet elektronike të përdoreshin në mënyrë të përditshme nga 47 mijë nxënës, në 60 gjimnaze në të gjithë vendin. Për realizimin e tij qeveria shqiptare mori një kredi prej 3.5 milionë eurosh nga banka austriake, UniCredit, në maj të 2014-ës, me justifikimin e përfshirjes së teknologjisë në ato që i quante 120 klasa “inteligjente”. Me nisjen e vitit të ri shkollor, 2015-2016, qeveria premtoi se në 60 gjimnaze të vendit do të niste një etapë e re modernizimi, ku rreth 47 mijë nxënës në 120 klasa me 5, 850 tablete të shpërndara nuk do të kishin më “nevojë” për librin, pasi atë do ta gjenin të digjitalizuar në tabletë. Projekti i modernizimit të sistemit arsimor në Shqipëri përmes e-edukimit parashikonte krijimin e 120 klasave inteligjente në 60 gjimnaze, 43 në zonat e mëdha urbane dhe 17 në zonat rurale, megjithatë nuk ka ende një “klasë inteligjente” që të funksionojë plotësisht.
Situata paraqitet e njëjtë në gjimnazin “Sami Frashëri” në Tiranë, “Ismail Qemali”, “Eqrem Çabej”, por edhe në rrethe, kryesisht në shkollën “Luigj Gurakuqi” në Elbasan apo në gjimnazin “Shefqet Guzi” në Gramsh, sipas investigimit të kryer nga “Pse”.
E pyetur në kuadër të këtij investigimi, zëvendësministrja e Arsimit, Nora Malaj, shpjegoi qëllimin e projektit, por jo problemet që janë hasur gjatë implementimit të tij. Ajo tha se, “synohej që nxënësit dhe mësuesit, jo vetëm që duhet ta marrin informacionin në kohën e duhur, por edhe në mënyrë bashkëkohore”.
(XH.A/SHUPLAKA)
Discussion about this post