Duke filluar nga ora 09:30 ditën e sotme, fillojnë në Këshillin e Lartë të Prokurorisë intervistimet e tre kandidatëve zyrtar të mbetur në garën për Prokuror të Përgjithshëm, Arta Marku, Fatjona Memçaj dhe Olsian Çela në lidhje me pikëzimin dhe vlerësimin përfundimtar.
Duke qenë se posti i kreut të organit të akuzës është administrativ, pyetjet dhe interesimi i anëtarëve të KLP nuk do të jenë lidhur me karrierën dhe dosjet që kanë trajtuar dhe hetuar kandidatët gjatë punës së tyre, por në lidhje me aftësitë drejtuese, aftësitë profesionale dhe organizative.
Gazetari i Fax Neës Sokol Dema raporton se intervistimi do të jetë i ngjashëm me kandidatët e SPAK, por me ndryshimin se kësaj here do të jetë e gjitha transparente, në transmetim të lirë direkt në media (kërkesë e cila është bërë prej kohësh nga mediat).
Një ditë pas intervistimit, që i bie ditën e enjte, datë 14 nëntor, KLP do të publikojë renditjen e tre kandidatëve, nga më i miri tek më pak i miri, renditje e cila kalon në Kuvend. Ky i fundit është i detyruar që brenda 30 ditëve të kalojë për votim për zgjedhjen e Prokurorit të Përgjithshëm, i cili sipas Kushtetutës kërkon shumicë të cilësuar votash, 84.
Nëse Kuvendi nuk arrin të zgjedh Prokurorin e Ri të Përgjithshëm me 3/5-at e votave, atëherë me vendim të KLP emërohet automatikisht në krye të Prokurorisë së Përgjithshme kandidati i parë i renditur nga pikëzimi dhe vlerësimi.
E gjithë kjo procedurë, nga ku vendi do të ketë kreun e ri të akuzës me mandat të plotë, pritet të bëhet brenda afatit 30 ditor, me fillimin e numërimit nga dita e enjte, datë 14 nëntor.
Në krye të Prokurorisë së Përgjithshme prej gati dy vitesh ka drejtuar si e përkohshme, Arta Marku, e zgjedhur me akuzash nga opozita. Ajo rikthehet në Kuvend për të kërkuar një mandat të plotë.
Discussion about this post