3 kufoma në det vetëm brenda muajit Mars, dy në Vlorë dhe një në Durrës (DETAJE)

Tre trupa të pajetë janë gjetur në breg ose thellësi të detit, brenda muajit Mars, në Vlorë dhe qytetin e Durrësit.

Ishte fillimisht kufoma e gjetur më 9 mars në Plazhin e Zvërnecit, e identifikuar vetëm disa ditë më parë si Loni Isai 32 vjeç, pronar i një bilardoje në Vlorë. Ndërkohë që ende nuk dihen arsyet e vrasjes së tij.

Më 15 mars, një tjetër trup i pajetë u gjet në qytetin e Durrësit. Mëngjesin e asaj dite, u bë me dije se një trup i pajetë u gjet në orën 07:30 të mëngjesit brenda në det, midis zonës së trageteve dhe peshkimit.

Ai u identifikua si Pjetër Frroku 54 vjeç, banues në Lezhë, i punësuar si peshkatar në një firmë peshkimi në qytetin e Durrësit. Nga këqyrja e kufomës rezultoi se nuk kishte shenja dhune.

Ndërsa kufoma e tretë u gjet mëngjesin e sotëm, 1 milje larg bregut, në afërsi të ishullit të Sazanit. Ai u gjet nga peshkatarët, të cilët njoftuan menjëherë Rojen Bregdetare. Ende nuk ka informacione lidhur me identitetin e tij.

(XH.A/SHUPLAKA)