3 kushtet e Metës, Bushati: Fantazi për piano e orkestër, kam kërkuar autorizim jo plotfuqishmëri

Ministri i Jashtëm, Ditmir Bushati në një deklaratë për mediat është pyetur nga gazetarët lidhur me nisjen e negociatave me Greqinë.

Interesit të gazetarëve se çfarë mendon ministri i Jashtëm lidhur me ‘3 kushtet’ e Presidentit Meta, Bushati ka thënë se këto janë fantazi.

“Këto janë fantazi për piano e orkestër”, u shpreh Bushati.

Bushati tha se Metës nuk i është kërkuar plotfuqishmëri por autorizim për nisje të negociatave. Sipas tij, vetëm kur negociatat kanë përfunduar dhe kur palët kanë një marrëveshje kërkohet plotfuqishmëria.

 “Unë kam kërkuar në bazë të Ligjit për Marrëveshjet Ndërkombëtare autorizim, jo plotfuqishmëri, autorizim për të nisur punën. Procedura është e tillë, fillimisht kërkohet një autorizim për të nisur punën. Nis puna, përcaktohet ekipi, përcaktohet platforma dhe fillojnë diskutimet apo negocimi.

Pasi përfundon negocimi do të duhet sërish që nga ana e Presidentit të Republikës të lëshohet autorizimi për firmosjen e marrëveshjes dhe në një rast të tillë Presidentit të Republikës, Ligji i Marrëveshjeve Ndërkombëtare, i ka dhënë mundësinë për të verifikuar në rast se platformë mbi të cilën ka filluar puna, përputhet me projektmarrëveshjen e arritur. Dhe diga e tretë apo hapi i tretë ku Presidenti i Republikës sërish ka një rol, është në momentin kur marrëveshja miratohet në Kuvend dhe Presidenti i Republikës ka të drejtën e dekretimit ose jo të kësaj marrëveshjeje.”, deklaroi ministri.

(F.G/Faxweb.al)