Punëtorët e Rafinerisë së Ballshit kanë dalë sërish sot në protestë përpara prefekturës, ku janë ankuar për shkak se tre muajt e fundit nuk u janë dhënë pagat, ndërsa prej 9 muajsh nuk u janë derdhur siguracionet nga familja.
Janë më shumë se 600 puonjës në Rafierinë e Ballshit, që pritet ta përshkallëzojnë protestën e tyre, duke ardhur në Tiranë përpara Ministrisë së Energjitikës.
“Siç e dini dhe ju kjo është një situatë e përsëritur, nuk na janë paguar sigurimet shoqërore prej 9 muajsh, dhe pagat nuk na kanë kaluar për tre muaj. Zoti prefekt na premtoi herën e kaluar se do ta zgjidhte këtë situatë, ndërsa sot nuk është fare këtu.
Ka njerëz të sëmurë që nuk shkojnë dot të kurohen dhe të vizitohen, unë vetë figuroj i punësuar dhe nuk hyj dot as në skemën e ndihmës ekonomike. Pse nuk janë derdhur 9 muaj sigurimet shoqërore, dikush duhet të japë llogari!”, shprehet një prej punonjëse.
“Ka një muaj e gjysmë që nuk vjen asnjë përfaqësues i kompanisë që të bisedojë me ne, të paktën të na shkëpusin librezën e punës, që të mos figurojmë të punësuar. Ndihemi të braktisur totalisht, nuk vjen një deputet që të vijë dhe të bisedojë më tej. Kështu nuk mund të vazhdohet, ka njerëz që e kanë lidhur jetën me atë uzinë.
Nuk kemi të ardhura të tjera, pjesa dërrmuese e punëtorëve janë nga Ballshi, që përveç naftës ka zero mundësi punësimi. Na janë mbajtur paratë nga rrogat për sigurimet dhe nuk janë derdhur, ku kanë shkuar këto para. Shkojnë të dalin në pension dhe nuk bëjnë dot dokumentat, nuk mban asnjë institucion përgjegjësi”, tregon më tej punonjësi shqetësimin e tij.
Ata kujtojnë dhe një videokonferencë që kanë kryer me ministrin dhe me kryeministrin, ku ende nuk kanë marrë paratë 14 rrogave të prapambetura që prej 3 vitesh.
Discussion about this post