Në një kohë kur të gjithë artikulojnë zgjedhjet e parakohshme, që mund të mbahen në pranverën e vitit të ardhshëm, Faxweb.al mëson një lëvizje interesante në radhët e socialistëve. Vetëm në ditët e fundit ka pasur të paktën 3 takime joinformale ndërmjet dy prej personazheve më të rëndësishme në PS, pas Edi Ramës, Gramoz Ruçit dhe Taulant Ballës.
Takimet mes të dyve janë zhvilluar në ambiente private të kryeqytetit, pa praninë e personave të tjerë, çka na bën të mendojmë se bisedat e zhvilluara mes tyre kanë qenë tejet sensitive. Situata në PS, veçanërisht pas vendimit të BE-së për të mos na çelur negociatat as këtë vit, nuk ka qenë aspak e qetë, madje në mbledhjen e Kryesisë janë shtuar zërat e brendshëm kundërshtarë me Edi Ramën.
Kundërshtitë nuk vinin më nga Ditmir Bushati që ka dalë qartësisht kundër numrit 1 të qeverisë, por nga Fatmir Xhafaj, Pandeli Majko apo Mimi Kodheli, të tre senatorë në PS, dhe të besuar në poste shumë të larta ministrore në mandatin e parë të qeverisë së Edi Ramës. Kodheli kishte shkuar deri aty sa kishte deklaruar se mbajtja e zgjedhjeve të parakohshme duhej parë si një nga opsionet për të dalë nga kriza politike e tejzgjatur.
Po ashtu të tjera figura në radhë si Niko Peleshi, Blendi Klosi, por pse jo dhe Erion Veliaj presin për një lëvizje të gabuar nga ana e Ramës, në mënyrë që të fitojnë terren në PS, dhe të mund të synojnë sërish poste drejtuese në partinë kryesore të së majtës.
Nga ana tjetër opozita pavarësisht se ka artikuluar zgjedhjet e parakohshme për disa herë me radhë, është e qartë se pa një Reformë të re zgjedhore ato nuk mund të realizohen. Të gjitha shanset janë që Reforma të miratohet përpara Janarit, dhe ndoshta me një dakordësi të gjerë, që do të shënojë urën lidhëse dhe për zgjidhjen e krizës politike.
A do të ndërmjetësojnë Ruçi dhe Balla për futjen e opozitës së rrugës në zgjedhje të parakohshme me Edi Ramën kryeministër, dhe Edi Ramën në zgjedhje të parakohshme, kjo mbetet për t’u parë…
(E.K/Faxweb.al)
