11 prilli i 1985-ës është një datë që vijon ende të ruhet në memorjet e shqiptarëve, data kur ndërroi jetë ish-diktatori Enver Hoxha. Për shqiptarët që e kanë përjetuar atë regjim, ajo mbetet një periudhë brenda normales, ndryshe nga ata që s’i përkasin atyre viteve.
Vdekja e Enver Hoxhës u prit me ngashërime dhe lot, ku në kryeqytetin e Shqipërisë, njerëzit të panumërt u mblodhën në bulevardin “Dëshmorët e Kombit” dhe “Sheshin Skënderbej” për të vajtuar për vdekjen e liderit të tyre.
Kolapsi i rëndë që kishte përfshirë shëndetin e ish-diktatorit u bë i ditur që më 9 prill të atij viti, kur gjithçka që ishte në shërbim të udhëheqësit komunist, u trondit tërësisht. Sinjalet se Enver Hoxha kishte probleme me shëndetin u shpërndanë në të gjitha anët.
“Mjekët po bënin përpjekjet më heroike, të pandërprera, të papërshkruara, për t’i dhënë drejtimin e duhur luftës midis jetës dhe vdekjes. Kishte ndonjë çast kur dukej sikur po arrihej ndonjë përmirësim, por, pastaj papritur rrëzohej gjithçka. Kaluan kështu orë të tëra të një tensioni të patreguar. Vetëm rrahjet e zemrës së tij dëgjoheshin me një tingëllim torturues. Kështu na gjeti ajo orë e hidhur e 11 prillit 1985.”, e kujton atë ditë Sulo Gërdeci.
Enver Hoxha ndërroi jetë në shtëpinë e tij, pas një vdekjeje klinike qe kishte patur mengjesin e 10 Prillit.
(XH.A/SHUPLAKA)
