Presidenti i ardhshëm Ilir Meta, i ftuar në emisionin “Top story” të gazetarit Sokol Balla, i është përgjigjur kreut të opozitës Lulzim Basha se zgjedhja e tij si president, i ka kushtuar 35 milion euro kryeministrit Rama.
“Problemet e rrugëve zoti Basha i njeh më mirë se unë, se unë nuk kam qenë ministër transporti. Për ju dhe teleshikuesut mund të ishte interes merrni drejtorin dhe ish-drejtorin për rrugët. Kur më thanë që Basha bëri këtë akuzë, ministri i transportit do ikte në rrugë për t’i kthyer përgjigje zotit Basha dhe unë i kërkova mos ta bënte. U thashë mos e bëj sepse unë e kuptoj situatën e opozitës.
Nuk e di se pse nuk kemi një njohje aq të madhe, besoj se Berisha dhe Basha e dinë që nuk ka çmim, sepse për mua stabilitieti dhe harmonia janë gjërat më të shtrenjta, për mua nuk kanë çmim.
Unë mund t’ju them, askush nuk ka pse të keqkuptohet dhe të krijojë iluzione.”, ishin fjalët e Metës.
Kryetari i PD-së, Lulzim Basha pak kohë më parë, deklaroi se zgjedhja e Ilir Metës President ka qenë një pazar i shtrenjtë që është paguar me paratë e popullit. Këtë ai e argumenton me rrëshkitjet në rrugën e Elbasanit.
“Këta të dy pinë verë, ndërtojnë një ujësjellës nga fillimi në Shushicë duke djegur miliona lekë. 35 milionë dollarë për rrëshkitjet në rrugën e Elbasanit. Edi Rama dha 35 milionë euro për t’i mbyllur gojën Ilir Metes i cili nuk pranonte zgjedhje pa opozitën, dhe për ta bërë President!
35 milionë dollarë të shqiptarëve për ta ulur në karrigen e Presidentit, ky është komploti i derrave që bëjnë pazare në kurriz të demokracisë.
Ulen dy veta pinë verë të shtrenjtë dhe nga aty na del presidenti i Republikës, por kjo nuk është republika e qytetarëve, e të djathtëve, e të majtëve, gegëve toskëve kjo është republika e vjetër e krimit e drogës e derrave oligarkë që majmen në kurriz të shqiptarëve.
Shihni sa miliona luhen dhe gjithë pjesa tjetër është teatër kukullash me çdo kusht, kjo është loja, të tjerat janë të gjitha teatër kukullash”, ishte deklarata e Bashës. (D.D/Shuplaka)
