Në lidhje Skype në Fax News këtë pasdite foli aktivisti Andi Tepelena. Për gazetarin Albi Rakip ai komentoi marrëveshjen e Shqipërisë dhe Italisë për ardhjen e 36 mijë refugjatëve nga vendet afrikane në Portin e Shëngjinit dhe në ish-bazën ushtarake të Gjadrit në Lezhë.
Tepelena u shpreh se nga kjo marrëveshje do të krijohet një bombë sociale për Shëngjinin dhe Lezhën. Shëngjini është një vend turistik dhe ardhja e refugjatëve do të krijojë probleme të mëdha socio-ekonomike për zonën. Nga ana tjetër, kontigjenti i tyre është i rrezikshëm dhe ardhje e tyre i ngjan më shumë një deportimi.
Andi Tepelena: Marrëveshje okulte që ka kaluar pa u konsultuar me një fshehtësi skandaloze. Pritja e një kontigjenti shumë të madh emigrantësh, rreth 3000 në muaj, 36 mijë në vit. Është gati një qytet i tërë i vendosur në dy kampe në Shëngjin dhe në Gjadër. Bëhet fjalë për deportim, të cilët nuk kanë status emigranti, nuk dihet statusi i tyre. Një pjesë e tyre e madhe flitet që vijnë nga vende shumë problematika, mund të jenë të infiltruar edhe nga njerëz me probleme penale. Po krijohet precedenti i Guantanamos. Rrezik të kthehen në burgje këto dy lloj kampesh. Çfarë bombe sociale krijohet në këto raste?!
Tepelena shton se kjo marrëveshje okulte nuk mund të kalojë kështu dhe në ditët në vijim do të ketë reagime të forta dhe një protestë të fuqishme përpara kryeministrisë.
Andi Tepelena: Ardhja e një kontigjenti të tillë njerëzish për Shëngjinin do të ishte një gropë e madhe. Nga ana tjetër kemi një problem. Opinioni publik alarmohet vetëm në momentin e rrezikut. Kja një shqetësim shumë të madh. Po të bëjmë një sondazh jam i bindur se 99% e shqiptarëve nuk e duan këtë gjë, sepse është një bombë sociale. Është rrezik për sigurinë sociale dhe kombëtare. Unë mendoj se në ditët në vijim do të kemi reagime të tjera dhe do të kemi një protestë të madhe përpara kryeministrisë, nuk mund të kalojë kjo gjë kështu.
Discussion about this post