Vazhdojnë kërkimet e “Mbrojtjes Civile” Italiane në kërkim të njerëzve të bllokuar nga orteku i borës në rajonin e Abruzzos.
Tërmeti i së mërkurës në Italinë qëndrore konsiderohet shkaktari i ortekut të fuqishëm të përplasur mbi një hotel pranë malit Gran Saso të Abruzzos.
Sipas “La Repubblica”, 4 persona kanë humbur jetën, ndërsa 25 të tjerë janë plagosur.
Deri tani vetëm trupi i pajetë i një personi është nxjerrë nga rrënojat ndërsa autoritet besojnë se në hotelin Rigopiano në Gran Sasso, në afërsi të qytetit Farindola, në provincën e Pescaras ndodhen të bllokuar rreth 30 persona, mes tyre edhe fëmijë.
Sipas informacioneve të para dhe raporteve të mediave italiane, kanë qenë lëkundjet e shumta të tërmeteve që kanë shkaktuar ortekun dhe për pasojë aksidentin tragjik. Në fakt ngjarja ka ndodhur mbrëmë, por rrugët e bllokuara nga bora kanë bërë të pamundur ndërhyrjen e shpejtë të ekipeve të emergjencës.
Një valë tërmetesh të forta goditën një ditë më parë po atë zonë të Italisë që doli thuajse e shkatërruar nga lëkundjet vdekjeprurëse të tokës vitin që shkoi. Tërmetet e magnitudave 5.3, 5.7 dhe 5.6 ballë ranë që të gjithë brenda harkut kohor të një ore. (A.R/SHUPLAKA)
