Alibeaj sulmon Ramën duke i kujtuar tonët e drogës që po kalojnë në kufijtë tanë. “Në tre ditët e fundit, 2 ton drogë ka kaluar nga kufinjtë tanë për në Greqi dhe në Itali. 1 ton në Greqi, dhe 1 ton drogë në Itali, dhe këtu bëhet fjalë për sasinë e kapur nga policia”, tha kreu i Departamentit të Rendit dhe Sigurisë në PD.
Sipas Alibeajt raporti është që në 10 ngarkesa, policia fqinje arrin të ndalë vetëm njërën dhe përfytyroni sa drogë shqiptare ka kaluar këto ditë në Greqi dhe në Itali.
“Ndërkohë Edi Rama e mohon, thotë se nuk ka drogë, nuk kemi problem me drogën, edhe pse mbarë Europa është e shqetësuar, media italiane, greke, gjermane dhe BBC japin alarmin për hashashin shqiptar që po mbulon vendet e tyre”, sqaroi ai.
Për Alibejan droga dhe përfshirja e qeverisë në këtë biznes kriminal, është një realitet i frikshëm, që po inkriminon shoqërinë, po pushton rininë e shkollat, po shkatërron imazhin e vendit tonë dhe është një prej mureve që po pengon integrimin europian të vendit.
Kreu i Departamentit të Rendit në PD-në fajëson kryeministrin Edi Rama për këtë situatë, duke thënë i vetmi njeri që nuk e kupton këtë gjendje të rëndë është Edi Rama, i cili duke e mohuar drogën po vetëshpallet si kumbari i saj.
Discussion about this post