Arbana Xharra, kryeredaktore e Gazetës “Zëri” në Kosovë është kërcënuar pak ditë më parë.
Pranë derës së apartamentit ku jeton dhe në parkingun ku e lë veturën, është vizatuar shenja e kryqit me ngjyrë të kuqe. Edne nuk dihen autorët e kësaj ngjarjeje por policia po punon për identifikimin e tyre.
“Kemi lajmëruar policinë dhe njësiti i krimeve të rënda po merret me rastin” ka deklaruar Xharra për Gazetën Express.
Sipas Xharraës kërcënimi në formë kryqi është vizatuar pasi që ajo ka dalë nga apartamenti.
“Andini (bashkëshorti) kur ka dalë prej banesës dhe e ka pa te dera këtë shenjë. Kanë dalë me pa nëse ka kamera diku rrotull. Tu kërku kamera e kanë pa që edhe në parking ku unë e parkoj veturën është e njëjta shenjë”, u shpreh Xharra.
Ajo më pas e ka lajmëruar rastin në Polici, por deri më tash nuk ka asgjë konkrete në këtë drejtim.
Arbana Xharra kohën e fundit ka marrë kërcënime të ndryshme.
“Javët e fundit është bërë linçim i madh ndaj meje, nga disa taborë; radikalë fetarë dhe individë brenda Lëvizjes Vetëvendosje. Portali Pampress ka bërë shpifje në emër të sarkazmës gjoja unë e kam sulmuar Kryeredaktorin e saj me armë, ndërkohë portale tjera në Maqedoni dhe Kosovë kanë lëshuar edhe gënjeshtra të tilla gjoja daja im ishte bashkëpunëtor i regjimit. Unë nuk e drejtoj gishtin ndaj askujt. Po presim policinë…”, përfundoi ajo. (J.V/Shuplaka)
