Na ndajnë pak orë nga skadimi i afatit zyrtar për dorëzimin e listave të Partisë Demokratike në KQZ dhe ende nuk kemi asnjë informacion për mediat.
Prej pesë ditësh tashmë kreu i opozitës Lulzim Basha nuk del në një deklaratë po takimet e shumta në zyrë nuk kanë munguar.
Të qenë të mësuar me faktin se Basha dilte dy herë në ditë nga çadrat, mungesa e tij ndihet mjaft tashmë.
Edhe pse pritet që sot të dorëzohen listat e demokratëve, nuk dihet nëse Basha do të ketë një deklaratë në lidhje me vemdimet e marra.
Listat, emrat që do të përfshihen, emrat e ministrave teknikë, emrat e drejtorëve të rinj, janë vetëm disa nga shqetësimet e Bashës pas marrëveshjes së 18 Majit me kryeministrin Rama.
Në media qarkullojnë plot emra, por zyrtarisht nga Partia Demokratike nuk ka asnjë emër të sigurt për lista. Ndërkohë që dita e sotme është dhe afati i fundit i dorëzimit të tyre në KQZ.
Dje PD dorëzoi zyrtarisht kërkesën për tu rregjistruar në zgjedhje pranë JQZ-së, ndërsa rrugën e saj ka ndjekur sot dhe Partia Republikane. Sipas Mediut marrëveshja me PD-në nuk u arrit dot.
Ndërsa tani një tjetër aleat i pakënaqur gjendet në zyrën e Bashës, Agron Duka dhe Partia e tij Agrare Ambjentaliste, kërkojnë më shumë sesa një emër të sigurt në listë.
Ende nuk dihet nëse mes palëve do të arrihet një marrëveshje. Po ashtu Dule me shumë gjasa do të dalë i vetëm, ndërsa një tjetër i pakënaqur i madh mbetet Kreshnik Spahiu.
Deri në orën e fundit që do të dorëzohen listat në KQZ na duhet të presim dhe të shohim dhe surprizat në rradhët e të vjetërve në PD. Vetë nga PD thonë se 30 % e emrave në listë do të jenë të rinj, duke paralajmëruar kështu që mund të ketë dhe surpriza.
(E.K/SHUPLAKA)
