Studentët që vijuan sot në ditën e katërt të protestës së tyre, kanë marrë hapa konkretë për denoncimin e pedagogëve që kërkojnë para për të dhënë provimet, pra për të marrë një notë kaluese.
Në foton e siguruar më poshtë nga Faxweb.al shihen qartë emrat e pedagogëve, që sipas tyre marrin ryshfet kundrejt notës.
Por, disa orë pas denoncimit të studentëve, ka ardhur dhe reagimi i pedagogut Kledi Xhaxhiu i cili figuron në këtë listë.
Pedagogu i kimisë në FSHN, Xhaxhiu duke e konsideruar këtë akuzë përbaltje të emrit të tij, tregon edhe faktorët se pse ai gjendet në atë listë dhe shprehet se është i hapur për hetime nga prokuroria, raporton ‘Faxweb.al’.
REAGIMI:
Konstatova se paturpësisht dhe me keqdashje është përbaltur emri im ne protestën e sotme të studentëve! Gjithkush me të cilin kam punuar qotë në FSHN apo edhe ne Politikë (si Zv. Ministër në Ministrinë e Mjedisit) e njeh ndershmërinë e punës sime! Kjo përbaltje e cila ka për synim të vetëm dëmtimin e figurës sime morale dhe profesionale, vjen nga dy faktorë:
1) Xhelozia e disa prej kolegëve të paarrirë të cilët nuk gjejnë formë tjetër për të me dëmtuar përveç shpifjes dhe gënjeshtrave.
2) Goditja politike, si ish pjesëtar i kësaj qeverie, të cilën unë e kam mbështetur dhe do të vazhdoj ta mbështes.
Ftoj PROKURORINË që të merret sa më shpejt me hetimin e këtij sulmi të paprecedent ndaj të drejtës themelore të personit për ruajtjen e dinjitetit dhe integriteti të tij moral dhe profesional.
Deklaroj se në rast se konstatohet qoftë edhe një rast i vetëm ku unë të jem përfshirë në një aferë korruptive, JAP MENJËHERË DORËHEQJEN nga pozicioni që mbaj, në të kundërt, të të gjithë ata që janë përfshirë në këtë përbaltje të mbajnë përgjegjësi morale dhe penale.
Discussion about this post