Më 20 maj 1973, në një nga kampet më famëkeqe të regjimit, shpërtheu një nga aktet më të rralla të qëndresës politike: Revolta e Spaçit, ku të burgosurit ngritën zërin kundër keqtrajtimeve. Sot, 52 vite më pas, kjo qëndresë vjen në vëmendje përmes një aktiviteti të organizuar nga Autoriteti i Dosjeve.
I dënuar me 10 vjet heqje lirie për agjitacion e propagandë, Lek Mirakaj është një ndër ish-të burgosurit e Spaçit. 52 vjet pas revoltës në këtë burg, ai, bashkë me një tjetër të dënuar në këtë vend famëkeq, Nestor Topençarov, sjellin në vëmendje vuajtjet në aktivitetin e organizuar nga Autoritet për Informimin mbi Dokumentet e ish-Sigurimit të Shtetit në bibliotekën e Kryeministrisë. Edhe pse ata kanë kaluar disa vite të jetës së tyre në Spaç, pas revoltës së 1973-it, vërejnë se pikërisht kjo revoltë e bëri edhe më çnjerëzor trajtimin që iu bëhej djemve dhe burrave në burg.
I futur në Spaç në korrik 1977, pas nëntë muajsh e gjysmë në birucat e Korçës ai u lirua në nëntor të ’82-it, por hera e parë që pa rrugën që të çonte te ky kamp ishte 2 vjet më parë.
