7.2 kilogramë kanabis në banesën e braktisur në Mat, nuk dihen autorët (VIDEO)

Ditën e sotme, policia ka sekuestruar plot 7.2 kilogramë kanabis në zonën e Matit. Mësohet se sasia e lëndës narkotike është zbuluar në fshatin e quajtur “Lek Hot”. Bëhet fjalë për kanabis në formë boceje, si edhe të tjera bimë në proces tharjeje.

Autorët ende nuk janë identifikuar.

Njoftimi i policisë

Vijon kontrolli i territorit për parandalimin e kultivimit të bimëve narkotike si dhe për goditjen e prodhimit dhe shitjes të lëndëve narkotike.

Gjatë kontrollit të territorit sekuestrohen nga Policia në një banesë të braktisur 7,2 kg lëndë narkotike e dyshuar Cannabis Sativa.

Në zbatim të planit të masave për evidentimin dhe goditjen e sigurimit të farërave për kultivimin e bimëve narkotike, Shërbimet e Komisariatit të Policisë Mat, kanë ushtruar kontrolle në territor dhe ambjente të ndryshme, në njësinë Administrative Baz, në fshatin “Lek Hot”.

Si rezultat i kontrolleve në një banesë të braktisur, është gjetur dhe sekuestruar një sasi lëndë narkotike në formë boçeje, e dyshuar Cannabis Sativa, si dhe disa bimë narkotike, degë e kërcej në proçes tharjeje.

Pas peshimit rezultoi se pesha e saktë ishte 7 kilogramë e 200 gramë lëndë e bimë narkotike në proçes tharjeje.

Lënda dhe bimët narkotike janë sekuestruar në cilësinë e provës materiale.

Vijojnë hetimet për të identifikuar dhe kapur autorët e implikuar në këtë veprimtari të paligjshme. (D.D/Shuplaka)