Një vajzë 7 –vjeçare i ka dërguar një letër të hapur presidentit të ri të Amerikës , Donald Trump. Në këtë letër vogëlushja e quajtur Bana al-Abed i ka kërkuar Trump-it që të bëjë diçka për fëmijët e Sirisë, pasi shumë nga miqtë e saj kanë vdekur në luftën që po zhvillohet në Aleppo.
Këtë letër ajo e ka dërguar nga shtëpia e saj e re në Turqi, dhe tregon se është larguar nga Siria për shkak të bombardimeve.
Letra e hapur është publikuar në BBC nga nëna e saj. Kjo vogëlushe u bë e njohur edhe për statuset e saj në Twitter për gjendjen që ndodhej Aleppo në kohën e luftës.
LETRA E PLOTË:
I dashur Donald Trump,
Emri im është Bana Alabed dhe unë jam një vajzë shtatë vjeçare siriane nga Aleppo. Kam jetuar në Siri gjithë jetën time para se të largohesha në muajin dhjetor të vitit të kaluar, jam pjesë e fëmijëve të Sirisë që kanë përjetuar luftën atje.
Por tani, jam duke përjetuar paqen në shtëpinë time të re në Turqi. Në Aleppo isha në shkollë por ajo u shkatërrua, për shkak të bombardimeve. Disa nga miqtë e mi vdiqën. Unë jam shumë e mërzitur për ta dhe do të doja që ata të ishin me mua, sepse tani do të luanim bashkë.
Në Aleppo nuk mund të luaja, sepse ishte qyteti i vdekjes. Në Turqi, mund të luaj dhe të kënaqem. Mund të shkoj edhe në shkollë, edhe pse këtë nuk e kam bërë akoma. Prandaj, paqja është shumë e rëndësishme për të gjithë, përfshirë edhe juve.
Megjithatë, miliona fëmijë sirianë nuk janë si unë dhe akoma janë duke vuajtur në shumë vende të Sirisë, ata po vuajnë për shkak të të rriturve. E di se ti do të jesh presidenti i ri i Amerikës, prandaj, të lutem të shpëtosh fëmijët dhe njerëzit e Sirisë. Ti duhet të bësh diçka për fëmijët në Siri, sepse ata meritojnë paqe. Nëse më premton se do të bësh diçka për fëmijët në Siri, jam tashmë mikja jote e re.
Discussion about this post