Ceremonia përkujtimore e 74-vjetorit të krijimit të Aviacionit Ushtarak Shqiptar u zhvillua në ambientet e hangarit të sapondërtuar të helikopterëve Black Hawk në Bazën Ajrore të Farkës. Të pranishëm në aktivitet ishin zëvendësshefi i Shtabit të Përgjithshëm të FA, gjeneral brigade Altin Kurti, komandanti i Forcës Ajrore, gjeneralmajor Ferdinand Dimo, drejtues të lartë të Forcave të Armatosura, përfaqësues të Shoqatës së Veteranëve të Aviacionit, si dhe familjarë të pilotëve dhe teknikëve.
Në fjalën e tij, ministri i Mbrojtjes, Niko Peleshi Vengu, theksoi rëndësinë e përgatitjes profesionale të personelit ushtarak, trajtimit të dinjitetshëm dhe investimeve të vazhdueshme në infrastrukturë, armatim dhe teknologji moderne për Forcën Ajrore.
“Objektivat tona fillojnë me kapitalin njerëzor dhe shkollimin. Shumë shpejt do të organizojmë një aktivitet që do të shënojë rithemelimin e Shkollës së Aviacionit, një hap kyç për të ardhmen e Forcës Ajrore,” deklaroi ministri.
Ai bëri të ditur gjithashtu se do të ketë rikthim të mjeteve fluturuese me krahë fikse dhe shtim të misioneve të dyfishta — që përfshijnë emergjencat civile, monitorimin dhe mbrojtjen kundërajrore — duke e cilësuar këtë të fundit si një komponent jetik që ka nevojë për rivëmendje strategjike.
Ministri Vengu nënvizoi se përpjekjet për përmirësimin e kushteve të punës, trajtimit financiar dhe përfitimeve për personelin ushtarak do të vijojnë, në përputhje me standardet e vendeve të NATO-s.
Nga ana e tij, komandanti i Forcës Ajrore, gjeneralmajor Ferdinand Dimo, theksoi se hangari i ri për helikopterët Black Hawk përfaqëson një investim të rëndësishëm në infrastrukturën moderne të FA, ndërsa kreu i Shoqatës së Veteranëve të Aviacionit, gjeneral brigade në lirim Astrit Jaupaj, falenderoi ministrin për mbështetjen e treguar ndaj ish-ushtarakëve dhe vlerësoi procesin e modernizimit të Forcës Ajrore.
Kjo ceremoni përkujtoi edhe fluturimin historik të parë të një avioni shqiptar, të kryer më 24 prill 1951 nga piloti Peço Polena – një moment kyç që shënoi fillesat e krenarisë dhe përkushtimit të Forcave Ajrore shqiptare në mbrojtjen dhe shërbimin ndaj vendit.
