Policia Kufitare ka goditur një tjetër rast të tentativës për të trafikuar lëndë narkotike nga Shqipëria drejt vendeve të tjera.
Mësohet se ditën e djeshme, policia ka sekuestruar 79 kilogramë lëndë narkotike Cannabis Sativa në Portin e Vlorës. Sasia e lëndës narkotike ishte fshehur në brendësi të kanatave të 9 dritareve duralumini, te një automjet kamion tip ”Mercedes Benz’..
“Në vijim të punës së pandërprerë të bërë nga D.V.K.M.Vlorë, për parandalimin, evidentimin dhe goditjen e rasteve të trafikimit të lëndëve narkotike, një tjetër rast është goditur në Portin e Vlorës nga këto struktura.
Si rezultat i kontrolleve në vijën e dytë të Pikës së Kalimit Kufitar shërbimet e Policisë Kufitare ditën e djeshme kanë goditur një tjetër rast të tentativës për trafikim të lëndëve narkotike.
Sasia e lëndës narkotike e dyshuar Cannabis Sativa me peshë totale prej 79 kilogramë u konstatua e fshehur në brëndësi të kanatave të 9 dritareve duralumini, brenda një automjeti kamion tip ”Mercedes Benz” .”, thuhet në njoftimin e policisë.
Si rezultat i kësaj ngjarjeje, janë arrestuar në flagrancë dy persona. Njëri 49 vjeç, me inicialet A.K dhe tjetri 48 vjeç me inicialet I.M. Të dy banues në vlorë.
Ndërkohë, policia ka nisur hetimet dhe po punon edhe për kapjen e një personi të tretë, që dyshohet si autor i kësaj veprimtarie të paligjshme. (D.D/Shuplaka)
