Drejtoria Qendrore e Shërbimit Antidrogë në Itali(DCSA) zbulon detaje të reja lidhur me ngjarjen që bëri bujë një ditë më parë. Bëhet fjalë për sekuestrimin e 8 ton drogë në Venecia, që kishte si pikënisje pikërisht Shqipërinë.
Në një njoftim për mediat, Policia e Shtetit njofton se sipas DCSA-së, organizata që ka kryer transportimin e lëndës narkotike drejtohet nga një maqedonas, por Shqipëria nuk ësshtë e përfshirë.
“Policia italiane ka konfirmuar që në lidhje me një artikull që ka qarkulluar në media për sekuestrimin e 8 ton lëndë narkotike në Venecia, Shqipëria nuk është e përfshirë as në njerëz e as në mjete. Konfirmimi vjen nga DCSA, Drejtoria Qendrore e Shërbimit Antidrogë. Hetimi është sekret dhe ndiqet nga tre Prokurori në Itali. Nuk mund të jepen të dhëna të tjera mbi hetimin për shkak të sekretit hetimor, por konfirmojmë që nuk ka të përfshirë nga pala shqiptare. Organizata kriminale është e drejtuar nga shtetas të maqedonisë. Policia e Shtetit mbetet nga partneret më të fuqishëm të policisë italiane në luftën kundër trafiqeve në përgjithësi dhe të trafikut të lëndëve narkotike në veçanti.”, thuhet në njoftim.
Lajmi për sekuestrimin e lëndës narkotike në Itali, është mbajtur i fshehtë për të bërë të mundur gjurmimin e personave të tjerë të përfshirë në këtë rrjet. Droga kishte kaluar qetësisht edhe portin e Ankonës, por shoferi maqedonas i kamionit e kishte ndaluar atë në një pikë servisi.
Në operacion morën pjesë GDF e Ankonës dhe kolegët e tyre të Venecias. Mediat thonë se autoritetet e kishin pikasur drogën që në port, por e lejuan të dalë për të kapur edhe bashkëpunëtorët. Mbetet ende e paqartë nga cili port shqiptar u nis kjo sasi rekord droge. (D.D/Shuplaka)
