Me rastin e Ditës Ndërkombëtare të Gruas, ministrja e Shtetit për Administratën Publike dhe Antikorrupsionin, Adea Pirdeni gjatë një takimi me gratë dhe vajzat sot në Pallatin e Kongreseve, në fjalën e saj tha se asnjë e drejtë, asnjë hap përpara, asnjë zhvillim i qenësishëm në mirëqenie nuk ka ardhur pa kërkesën, pa luftën dhe pa kontributin e vajzave dhe grave të këtij vendi.
Pirdeni tha se mbi 55% e kolegëve në institucionet e administratës janë gra, jo si rezultat i kuotave apo i ndonjë skeme favorizuese, por sepse ato kanë treguar se i përkasin misionit të shërbimit publik.
“Dua ta nis më së pari, me ndjesinë e veçantë që më jep ky takim sot me ju dhe modelet që ju përfaqësoni kudo kontribuoni. Çdo diskutim e bisedë në ditë me kaq rëndësi si kjo e sotmja për rolin e grave në shoqëri shpesh herë tenton të shkojë drejt një retorike që ngre në piedestal rolin, pa diskutim të merituar të gruas, duke lënë disi në hije rolin kyç të djemve dhe burrave, në të mirë të Shqipërie evropiane më të drejtë”, tha Pirdeni.
“Nuk jemi këtu sot në 8 Mars për të ngritur një agjendë ekstreme mbi një tjetër. Por jemi këtu sepse historia na ka mësuar një të vërtetë të thjeshtë: progresi kurrë nuk dhurohet dhe as mund të mohohet. Asnjë e drejtë, asnjë hap përpara, asnjë zhvillim i qenësishëm në mirëqenie nuk ka ardhur pa kërkesën, pa luftën dhe pa kontributin e vajzave dhe grave të këtij vendi”, u shpreh Pirdeni.
Pirdeni theksoi se “kam fatin dhe përgjegjësinë e madhe ta dëshmoj këtë të vërtetë çdo ditë me koleget e administratës”.
“Pa kurrëfarë hezitimi mund ta them se administrata publike shqiptare qëndron mbi forcën e vajzave dhe grave shumë profesioniste. Prej vitesh tashmë mbi 55% e kolegëve në institucionet tona janë gra, jo si rezultat i kuotave apo i ndonjë skeme favorizuese, por sepse ato kanë treguar se i përkasin misionit të shërbimit publik”, tha Pirdeni.
Ministrja shtoi “nuk e them këtë për të mikluar me shifra një ditë kaq serioze si e sotmja, por e përmend sepse kam bindjen reale që kjo është dëshmi e pastër e aftësisë, përkushtimit dhe sakrificave të gjitha vajzave dhe grave që çdo ditë u kanë dedikuar jetën e tyre shërbimit publik. E teksa kjo ngjan krejt e natyrshme, pasi historia e ka lidhur rolin e grave me shërbimin, por jo patjetër me drejtimin, e tashmja dhe e ardhmja që aspirojmë flet ndryshe”.
“Sot në Shqipëri, për fat, kemi shumë modele të grave eksperte, drejtuese, reformatore, por dhe ministre. Ato janë garancia që shërbimi publik të funksionojë me seriozitetin që i duhet shtetit modern evropian që po mundohemi të konsolidojmë të gjithë bashkë. Kjo nuk është një nevojë për protagonizëm dhe as rastësi, por një zgjedhje e qëllimshme për të jetuar çdo ditë vlerat tek të cilat ne besojmë, dhe për të jetësuar rezultatet që aspirojmë”, u shpreh Pirdeni.
Gjatë fjalës së saj ministrja nënvizoi “e shoh tek koleget e mia, tek gratë që punojnë me pasion, që nuk dorëzohen dhe që pavarësisht sfidave, vazhdojnë të shtyjnë përpara. Gra që si të gjitha ne këtu, i janë dedikuar me mish e me shpirt një të tashme dhe të ardhme më të mirë, këtu në Shqipëri, me dëshirën e mirë për të bërë më të mirën, por dhe me kthjelltësinë se shumë ende kemi për të bërë përpara në rrugën e transformimit drejt më të mirës së mundshme”.
“Për t’iu rikthyer mesazhit të fillimit, një falenderim i veçantë shkon sot edhe për të gjithë ata burra që në përditshmëri mbështesin gratë në punë, biznes, në shtëpi, ato që i fuqizojnë dhe i promovojnë. Por mbi të gjitha ato që janë krenar për gratë me të cilat ndajnë jetën e tyre personale ose profesionale dhe jo vetëm e mendojnë, por nuk e mbajnë për vete dhe kanë guximin ta thonë këtë, jo vetëm në 8 Mars, por çdo ditë, pavarësisht se në fillim mund te mos u vijë shumë e natyrshme”, tha ministrja.
E për ta përmbyllur, shtoi Pirdeni, “nuk kam dyshim që në çdo orë e çdo ditë të rrugëtimit evropian të Shqipërisë, në këto kilometra të fundit që na kanë mbetur, do të mbështetemi tek të gjitha ju. Jeni ju shtylla kurrizore e kësaj shoqërie, shtyllë që qëndron drejt pavarësisht përthyerjeve të vështirësive”.
Discussion about this post