7 prilli i vitit 2009 do të mbahet mend si një datë historike për shqiptarët pasi mbart një rëndësi të veçantë për vendin tonë, i cili 8 vite më parë u bë pjesë e North Atlantic Treaty Organisation (NATO).
Që prej anëtarësimit të Shqipërisë në NATO nisi menjëherë zbatimi i planit të integrimit që nënkuptonte reformimin e thellë të sektorit të sigurisë e mbrojtjes me qëllim ndërveprimin e plotë me NATO-n.
Procesi i konsultimit për anëtarësimin e vendit tonë në NATO ka qenë një proces me zhvillime. Gjatë viteve 2004-2008, Shqipëria zhvilloi një sërë takimesh në kuadër të MAP, PARP dhe Ministerialit të NATO/EACP etj. Ajo ishte e angazhuar në përmbushjen e 43 objektivave të partneritetit që përcaktonin masat për të aftësuar më tepër Forcat tona të Armatosura për të operuar së bashku me forcat e Aleancës.
Tetë vite më parë, në mars të 2009-ës, ministri i atëhershëm i Mbrojtjes, Gazmend Oketa, shprehej i bindur se nuk kishte asnjë pengesë për anëtarësimin e Shqipërisë në NATO, duke theksuar se vendi ynë ishte gati të bëhej pjesë e kësaj aleance.
Marrja e ftesës së anëtarësimit në këtë aleancë (në Samitin e Bukureshtit 2 prill 2008) dhe anëtarësimi me të drejta të plota në Samitin e Strasburg & Kehl, 2 prill 2009, finalizoi përpjekjet dhe aspiratën mbarëshqiptare për anëtarësim në NATO.
North Atlantic Treaty Organisation u themelua në vitin 1949 në bazë të Traktatit të Atlantikut të Veriut, i cili u nënshkrua në Washington më 4 prill 1949. Roli kryesor i kësaj aleance është të ruajë lirinë e shteteve anëtare dhe mbrojtjen me anë të forcës ushtarake. Ajo luan një rol të rëndësishëm në krizat politike dhe të gjitha shtetet anëtare të saj kontribuojnë me forcat dhe pajisjet e tyre ushtarake.
(XH.A/SHUPLAKA)
Discussion about this post