Papa Françesku ka festuar sot ditëlindjen e tij të 80-të, por megjithatë e ka nisur ditën me punë.
Sipas mediave italiane, në 80 vjetorin e lindjes së tij, Papa argjentinas e nisi ditën duke celebruar një meshë në Kishën e Paolinës, në Pallatin Apostolik në Vatikan. Ka ngrënë mëngjes me të pastrehët, dhe ka ofruar ëmbëlsira në mensat e të varfërve.
Papa Françesku mund të ketë kërkuar që të mos organizohet asnjë festë në nder të tij, megjithatë nuk ka arritur tu shpëtojë urimeve nga e gjithë bota.
Presidenti i Italisë Sergio Mattarella i shprehu mirënjohjen Papës së shenjtë për rolin që ka luajtur në në forcimin e dialogut, marrëdhënieve dhe solidaritetin mes popujve.
Ndërsa presidenti amerikan Barack Obama, u shpreh se përulësia e Papës duhet të shërbejë si një guidë për tërë botën, dhe e falenderoi atë për rolin që ka luajtur në normalizimin e marrëdhënieve të SHBA-së me Kubën.
Madje edhe presidenti Bujar Nishani, e ka uruar atë përmes një shkrimi.
“Në këtë jubile të shënuar, kam kënaqësinë dhe privilegjin që t’ju shpreh konsideratën e lartë për të gjithë kontributin tuaj të vyer në shërbim të përunjur Hyut sidomos për formësimin bashkëkohor që po i jepni kohët e fundit Kishës Katolike anembanë botës.
Gjithashtu dëshiroj të shpreh vlerësimin maksimal për mesazhet e ngrohta si dhe përkujdesjen tuaj atërore ndaj Kishës Katolike dhe besimtarëve shqiptarë si dhe për vlerësimin që vazhdoni të tregoni për ta duke shenjtëruar Nënë Terezën tonë, duke shpallur 38 martirët tanë të bekuar si dhe duke emëruar së fundmi Kardinali Ernest Troshani”, shkruan presidenti Nishani.
Papa Françesku ka lindur mbrëmjen e 17 dhjetorit të vitit 1936 në Buenos Aires të Argjentinës.
