82-vjeçari vrau me sende të forta të shoqen në Përmet, dëshmon nipi i çiftit: Ka pasur denoncim nga e ndjera para disa vitesh

Nipi i çiftit Peçi ka rrëfyer mbi marrëdhënien e 82-vjeçarit Leonidha Peçi dhe bashkëshortes së vrarë prej tij, 80-vjeçares Afroviti Peçi.

Në emisionin me “Zemër të hapur”, ai ka dëshmuar se gjyshi i tij është denoncuar prej së ndjerës disa vite më parë. Ai tregon se shkonte shpesh t’i vizitonte, por asnjëherë nuk ka kuptuar ndonjë problem mes tyre.

Çifti i të moshuarve ka pasur 5 fëmijë, ku dy prej tyre kanë humbur jetën, konkretisht djali i tyre dhe një prej vajzave (e ëma e dëshmitarit).

Ai thotë se 3 vajzat e tjera jetojnë në Greqi dhe se i kanë kërkuar të dyve të shkonin të bashkëjetonin me to, por nuk kishin pranuar.

“Ka pasur denoncim nga e ndjera para disa vitesh. Kanë humbur dy fëmijët. Nuk e di nëse kanë pasur probleme të shëndetit mendor. E kemi kuptuar që gjyshi nuk ishte mirë, i bëmë të tëra. Nuk pinte. Daja ka shumë vite që ka ndërruar jetë, ndërsa nëna ime 4 vjet.
Unë vija shumë shpesh, i pyesja si jeni, më thoshin mirë. Nuk më tregonin.
Marrëdhënia e nënës sime me gjyshërit ishte shumë e afërt. Nga ana ekonomike ishin mirë, nuk kishin probleme.
Tezet e mia iu kishin kërkuar që të shkonin në Greqi për të jetuar me to dhe pranë tyre, por nuk kishin pranuar. Ne nuk e prisnim këtë që ndodhi”, tha nipi i të moshuarve.

Ditën e djeshme, Leonidha vrau me sende të forta bashkëshorten e tij, 80-vjeçaren Afroviti. Ngjarja u zbulua nga zonja e cila u sillte qumështin në shtëpi.