Një ngjarje shokuese ka ndodhur mbrëmjen e sotme në spitalin “Shefqet Ndroqi”, ku një pacient i shtruar me Covid-19, është vetëhedhur nga kati i katërt i spitalit, ku ka ndërruar jetë në vend.
Bëhet fjalë për një 65 vjeçar nga Fushë-Kruja me iniciale M.H, i cili kishte dy ditë i shtruar në spital në gjendje të rënduar shëndetësore, por jo i intubuar.
65-vjeçari ishte në një gjendje të stabilizuar dhe ngjarja e rëndë ka ndodhur rreth 30 minuta më parë, ndërkohë që ende nuk bëhet e ditur se çfarë e ka shtyrë të moshuarin ti japë fund jetës së tij.
Kjo është ngjarja e dytë e rëndë e raportuar që përsëritet vetëm brenda pak javësh në spitalin “Shefqet Ndroqi”, pasi pak javë më parë, 29-vjeçari Xhino Koça, i infektuar me Covid-19, i dha fund jetës duke u hedhur nga kati i tretë.
Ndërkaq gjendja rëndohet akoma më tepër, pasi raportohet edhe për një pacient të tretë që ka tentuar pak kohë më parë që të vetëhidhet nga spitali, por është mbajtur me forcë nga mjekët.
Sipas raportimeve personi ka tentuar të hidhet nga kati i tretë, ndërkohë që është mbajtur me forcë dhe këto akte shtojnë nevojën të merren masa për një trajtim psikologjik të të sëmurëve, pasi mund të ketë edhe raste të tjera.
“65-vjecari ka shkuar në spital në gjendje të rëndë shëndetësore dhe është futur menjëherë në trajtim intensiv, ndonëse jo i intubuar. Ai është nga zona e Fushë Krujës, Laçit. Ka pas dhe një tentativë tjetër, të një presoni që është ndaluar në kohë nga stafi mjekësor. Nëse nuk merren masa për një trajtim psikologjik të të sëmurëve mund të ketë edhe raste të tjera. Këta persona kanë nevojë për psikologë, për dikë që të dijë t’i qetësojë, t’iu japë shpresë se kjo sëmundje nuk është fatale.”- tha gazetari Erion Skëndaj.
Discussion about this post