Kolegji i Posaçëm i Apelimit ka lënë në fuqi vendimin e KPK-së pëer shkarkimin nga detyra të Kryetarit të Gjykatës së Fierit, Roland Jaupaj. KPK e shkarkoi gjyqtarin Jaupaj në maj të vitit të kaluar pasi i gjeti parregullsi të shumta në deklarimin e pasurisë. Vendim ky i cili u apelua në KPA prej gjyqtarit Jaupaj, por që nuk e shpëtoi dot nga shkarkimi, pasi KPA la në fuqi vendimin e KPK-së.
Njoftimi i plotë: Trupi gjykues i Kolegjit të Posaçëm të Apelimit, i përbërë nga Ina Rama kryesuese, Albana Shtylla relatore, Ardian Hajdari, Rezarta Schuetz, Sokol Çomo anëtarë, shpalli vendimin për çështjen (JR) nr.36/2019, datë 31.07.2019, që lidhet me ankimin e subjektit të rivlerësimit Roland Jaupaj, kundër vendimit nr. 150, datë 28.05.2019 të Komisionit të Pavarur të Kualifikimit.
Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Lënien në fuqi të vendimit nr. 150, datë 28.05.2019 të Komisionit të Pavarur të Kualifikimit, që i përket subjektit të rivlerësimit Roland Jaupaj.
Ky vendim është përfundimtar dhe ka efekt të menjëhershëm. U shpall sot, në Tiranë, më datë 10.09.2020.
