Vrasja e 25-vjeçarit Klodian Rasha nga një punonjës Policie ka ngjallur reagimin dhe të Këshillit të Europës, veçanërisht pas protestave që po mbahen tashmë prej një jave në Tiranë.
Komisionerja e Këshillit të Evropës për të Drejtat e Njeriut, Dunja Mijatović në një deklaratë të bërë publike gjatë ditës së sotme, tha se autoritetet duhet të tregojnë përmbajtje në demonstratat e qytetarëve dhe të sigurojnë hetime të hollësishme, të pavarura dhe efektive për të gjitha pretendimet e përdorimit të tepruar të forcës.
Mijatović shtoi se ka pasur një përdorim jopropocional të forcës nga ana e Policisë, edhe në protestat e qytetarëve që pasuan në javën pas vrasjes. Komisionerja shton se fakti i ndalimit të protestave për shkak të Covid, nuk u jep të drejtën autoriteteve që të përdorin forcën në rastet e grumbullimeve.
Ajo vë në dukje përdorimin e gazit lotjsjellës të përzier me spraj, makinat e hedhjes së ujit, dhe mjete të tjera të përdorura nga ana e Policisë që kanë shkaktuar plagosjen e qytetarëve, duke përfshirë edhe fëmijët.
“Ndërsa e drejta për mbledhje paqësore mund të kufizohet për të mbrojtur shëndetin publik, autoritetet duhet të mbështesin parimet e domosdoshmërisë dhe proporcionalitetit në të gjitha rrethanat. Prandaj, ndalimet e grumbullimeve dhe shpërndarja e demonstratave për të vetmen arsye se ato shkelin rregullat e bllokimit, pa marrë në konsideratë masa më pak kufizuese, duhet të shmangen.
Policia duhet gjithashtu të bëjë dallimin midis individëve të përfshirë në dhunë dhe atyre që demonstrojnë në mënyrë paqësore dhe të përmbahen nga përdorimi i rëndë ose pa kriter i forcës. Për më tepër, çdo ndalim i fëmijëve duhet të kryhet vetëm si një masë e fundit dhe duhet të respektojë plotësisht të drejtat e tyre procedurale, duke përfshirë të drejtën për t’u pyetur vetëm në prani të një avokati ose njërit prej prindërve ose kujdestarëve të tyre. “
Komisionerja thekson se duhet të ketë një bashkëpunim dhe komunikim mes organizatorëve të protestave dhe pjesëmarrësve në to, në mënyrë që të shmanget përshkallëzimi i tensioneve.
“Është thelbësore të sigurohet që oficerët e policisë që veprojnë në kontekstin e demonstratave të marrin trajnim të specializuar në menaxhimin e protestave dhe në përdorimin propocional të forcës”.
Autoritetet duhet në çdo kohë të demonstrojnë tolerancë zero ndaj zyrtarëve të zbatimit të ligjit të përfshirë në përdorimin e tepruar të forcës, të cilët duhet të identifikohen, të çohen para drejtësisë dhe të sanksionohen në përputhje me praktikën gjyqësore përkatëse të Gjykatës Evropiane të të Drejtave të Njeriut.
Veshja e etiketave të dukshme të identifikimit ndihmon në sigurimin e përgjegjësisë. Për më tepër, personat që pretendojnë të jenë viktima të sjelljes së keqe të policisë duhet të jenë në gjendje të paraqesin një ankesë për të marrë dëmshpërblim.
Duke vënë në dukje se shumica e personave të ndaluar janë liruar, Komisioneri u bën thirrje autoriteteve të shpejtojnë lirimin e çdo protestuesi paqësor të mbetur që mund të jetë akoma në paraburgim.
Së fundmi, Komisioneri është i shqetësuar për ndalimin dhe sulmet e pretenduara ndaj disa gazetarëve që mbulojnë demonstratat. “Sulmet ndaj gazetarëve përbëjnë një shkelje serioze të lirisë së shtypit dhe të drejtës për tu informuar. Autoritetet duhet të sigurojnë që gazetarët mund të vazhdojnë të informojnë qytetarët pa frikë nga kërcënimet ose aktet e dhunës ”.
(E.K/Faxweb.al)
Discussion about this post